Þegar sá ótrúlegi atburður gerðist á sínum tíma að Steingrímur J. Sigfússon arkaði í reiðikasti að borði þáverandi forsætisráðherra í þingsalnum og lamdi hann bylmingshöggi, svo ráðherrann kastaðist til í sæti sínu ákvað Geir H. Haarde að gera gott úr.
Annað tveggja eða hvort tveggja hefði annars gerst.
Steingrímur hefði verið víttur í þinginu fyrir atburð sem er þar einsdæmi eða hann hefði verið kærður fyrir líkamsárás.
En heiðursmaðurinn í Geir réði þessari ákvörðun.
Og nú hefur Steingrímur í þakklætisskyni greitt honum enn þyngra högg en sjálft bylmingshöggið forðum. En Geir hefur í tilefni þriðjudagsins þó látið eftir sér að nefna athyglisverðan punkt.
Steingrímur J., sem allt þóttist hafa séð fyrir, eins og vanstillti prófessorinn í Háskólanum, reyndi að fá Geir H. með sér upp í sveit vorið 2007 til að mynda með honum ríkisstjórn. Sjálfum formanni „hrunflokksins“ eins og Steingrímur J. kallar það nú. Hvernig hefði hann greitt atkvæði í þinginu sl. þriðjudag garpurinn sá, ef sú ráðagerð hans hefði gengið eftir?
Hefði hann greitt atkvæði með því að ákæra sig? Ekki treystu þau Jóhanna og Össur sér til þess, en þau urðu Steingrími hlutskarpari í kapphlaupinu um Sjálfstæðisflokkinn vorið 2007, eins og menn muna, en vildu gjarnan mega gleyma.
Til baka
Leita í greinasafni
Prenta grein
