Leikmenn Barcelona héldu áfram að skemmta sér og knattspyrnuáhorfendum er þeir lögðu Espanyol 5:1 á útivelli í 1. deildinni á Spáni um helgina. Pedro og David Villa skoruðu tvö mörk hvor og Xavi eitt. Osvaldo skoraði mark Espanyol. Espanyol var fyrir leikinn í 4. sæti deildarinnar en það stóð ekki í vegi fyrir því að Barcelona ynni stórsigur.
Þetta er í 6. skipti sem Barcelona skorar 5 eða fleiri mörk í deildarleik á tímabilinu. Þeir hafa verið skerkari á útivelli í vetur en þar hafa þeir unnið alla sína átta leiki. Á heimavelli hafa þeir hins vegar tapað einum leik og gert eitt jafntefli en unnið sex. Mörkin hafa heldur ekki látið á sér standa þó þeir séu að spila að heiman en af 51 marki þeirra í deildinni hafa þeir skorað 29 á útivelli.
Það var tilfinningaþrungin stund fyrir áhorfendur og þá sérstaklega Andres Iniesta í upphafi leiks. Iniesta tileinkaði Jarques, fyrrverandi fyrirliða Espanyol, sem lést úr hjartaáfalli í fyrra, mörkin sem hann skoraði á heimsmeistaramótinu í sumar. Fólkið í kringum Espanyol hefur greinilega ekki gleymt þessu góðverki knattspyrnusnillingsins Iniesta. omt@mbl.is
Til baka
Leita í greinasafni
Prenta grein
