Hvað er klukkan?

Umsjónarmenn Kastljóss láta sér ekkert mannlegt óviðkomandi. Umfjöllunarefnin eru því af alls kyns toga og koma oft á óvart. Um daginn mættu tveir vaskir menn í þáttinn til að tala um klukkuna. Annar þeirra er þingmaður. Hann er sennilega orðinn jafnþreyttur á tali um Icesave og þorri þjóðarinnar og vill hleypa meiri gleði inn í líf alþýðunnar. Besta leiðin til þess er víst að seinka klukkunni því rannsóknir lærðustu manna sýna að þjóðin fer of snemma á fætur og er því stöðugt þreytt.

Alla ævi hefur manni fundist það brýnt hagsmunamál að fá að sofa lengur og þurfa ekki að eiga mikil tjáskipti fyrir klukkan tíu á morgnana. Það er gott að nú er á þingi maður sem beitir sér fyrir því að þjóðin sé ekki rifin á fætur um miðjar nætur og látin vinna. Það er líka gott að Kastljóssfólkið skuli standa vaktina og vekja athygli á brýnu hagsmunamáli sem varðar heill allrar þjóðarinnar. Einnig er afar huggunarríkt að frétta af því að þeir sem eru fremur styggir á morgnana séu ekki geðvondir að eðlisfari heldur séu þeir súrir vegna þess að þeir sæta svívirðilegri meðferð með því að vera látnir vakna þegar þeir eiga að vera að sofa.