Alvarlegt umferðarslys varð í Langadal í Húnavatnssýslu um kl. 19 í gærkvöld er tengivagn flutningabíls á leið norður lenti á flutningabíl sem kom úr gagnstæðri átt. Ökumaður síðarnefnda bílsins var fluttur mikið slasaður með þyrlu Landhelgisgæslunnar frá Blönduósi til Reykjavíkur.
Slysið varð í brekku á hringveginum vestan við Bólstaðarhlíðarbrekku. Ekki er fullljóst hver orsökin var en annaðhvort hefur tengivagninn losnað aftan úr bílnum eða hinn bíllinn lent á tengivagninum. Á honum voru steypurör sem dreifðust um veginn á 300-400 metra kafla.
Umferð var beint um Þverárfjallsveg í gærkvöldi. Að sögn lögreglu á Blönduósi var ekki búist við að hægt yrði að opna veginn á ný fyrr en liði á nóttina.
Þar sem slysið varð er víravegrið og lenti annar flutningabíllinn á því. Að sögn sjónarvotta slitnaði annar vírinn en hinn kom í veg fyrir að bíllinn færi út af veginum.
Til baka
Leita í greinasafni
Prenta grein
