Ritstjórn Morgunblaðsins, Fréttastofa RÚV og Fréttastofa Stöðvar 2 hlutu sameiginlega tilnefningu fyrir bestu umfjöllun ársins þegar tilkynnt var um Blaðamannaverðlaun Blaðamannafélags Íslands fyrir árið 2010 í nótt. Tilnefningarnar voru birtar á vefsíðu BÍ og kom þá í ljós að fjölmiðlarnir þrír höfðu verið tilnefndir sameiginlega fyrir umfangsmikla og vandaða en ólíka umfjöllun um eldgosin á Fimmvörðuhálsi og í Eyjafjallajökli.
Pétur Blöndal, blaðamaður á Morgunblaðinu, var tilnefndur til Blaðamannaverðlauna ársins fyrir fróðlegar og sérstaklega vel skrifaðar greinar um læknavísindi í sunnudagsútgáfu Morgunblaðsins. Aðrir tilnefndir í þeim flokki voru Kristinn Hrafnsson, fréttamaður á RÚV og talsmaður Wikileaks, fyrir framúrskarandi úrvinnslu á myndbandi um þyrluárás í Bagdad og fyrir störf sín sem fulltrúi Wikileaks, og ritstjórn DV fyrir Stjórnlagaþingsvef sinn.
Í flokknum Rannsóknarblaðamennska ársins hlutu tilnefningar Ingibjörg Dögg Kjartansdóttir, blaðamaður á DV, fyrir áleitna og vandaða umfjöllun um kynferðisbrotamál, Stígur Helgason og Trausti Hafliðason, blaðamenn á Fréttablaðinu, fyrir greinargóða og upplýsandi umfjöllun um málefni velferðarheimilisins Árbótar, og Þorbjörn Þórðarson, fréttamaður á Stöð 2, fyrir skilmerkilegan fréttaflutning af viðskipta- og fjármálum.
Til verðlauna fyrir bestu umfjöllun ársins voru, auk fjölmiðlanna þriggja sem hlutu sameiginlega tilnefningu, tilnefnd Magnús Halldórsson, blaðamaður á Viðskiptablaðinu, fyrir skýra umfjöllun um fjármál sveitarfélaga í aðdraganda sveitarstjórnarkosninga, og Sigríður H. Björnsdóttir og Þóra Arnórsdóttir ásamt fréttamönnum fréttastofu RÚV, fyrir sérstakan þátt með greinargóðri og viðamikilli umfjöllun um Rannsóknarskýrslu Alþingis, daginn sem hún kom út.
Til baka
Leita í greinasafni
Prenta grein
