Ágúst Ingi Jónsson
Gísli Baldur Gíslason
Goðafoss verður að öllum líkindum færður af strandstað í dag, en hann hefur setið fastur á skeri skammt frá Fredrikstad í Noregi síðan í fyrrakvöld. Um 800 tonn af olíu voru í tönkum Goðafoss og var í fyrstu óttast að slysið myndi hafa gríðarlega alvarlegar afleiðingar fyrir náttúruna á svæðinu. Með tveimur olíugirðingum tókst í gærdag að ná tökum á olíulekanum úr skipinu. Afleiðingarnar virðast því ekki ætla að verða jafnslæmar og haldið var í fyrstu. Undirbúningur að dælingu úr skipinu var hafinn í gær.
Fjórtán manna áhöfn er á Goðafossi og er hún ekki talin í hættu. Áhöfnin er öll um borð í skipinu ennþá og mun halda kyrru fyrir um borð.
Skipstjóri Goðafoss var kallaður í skýrslutöku hjá lögreglu í gær til að gera grein fyrir orsökum slyssins. Norska dagblaðið Aftenposten greindi frá því í gærkvöldi að skipstjórinn hefði viðurkennt að hafa misreiknað stefnuna og farið út af réttri leið með þeim afleiðingum að skipið tók niðri á rifi.
Um borð í Goðafossi eru 430 gámar. Flestir innihalda almennan farm en dýnamít er þó í einum þeirra.
Eimskip hefur þegar gert ráðstafanir vegna slyssins og hefur félagið leigt skip til að sinna verkefnum Goðafoss.
Fjárhagstjón vegna slyssins hleypur sennilega á tugum milljóna króna, hið minnsta.
Skárra en fyrst var talið 18
» Norska strandgæslan, Eimskip og umhverfissamtök hafa unnið saman að björgunaraðgerðum.
» Eimskip sendi fjóra fulltrúa til Fredrikstad í gærmorgun.
» Norskir ráðherrar fóru á vettvang til að skoða aðstæður.