Óvenjumargir lúsugir miðað við árstíma

STANGVEIÐI

Einar Falur Ingólfsson

efi@mbl.is

„Við erum að fá lúsuga fiska og það er óvenjulega mikið af þeim miðað við árstíma. Það sýnir hvað göngurnar eru seinar,“ segir Andrés Eyjólfsson, leiðsögumaður í Þverá og Kjarrá, og bætir við að í fyrradag hafi til að mynda veiðst lúsugur lax á Gilsbakkaeyrum í Kjarrá, en þá er fiskurinn kominn langleiðina inn á Arnarvatnsheiði. Andrés segir vatnið heldur minnkandi en fyrir fjórum dögum var áin kolmórauð eftir miklar rigningar.

Í síðustu viku veiddust rúmlega 250 laxar í Þverá og Kjarrá og segir Andrés aðeins hafa dregið úr síðustu daga, en í gær höfðu um 1.220 laxar verið færðir til bókar.

„Síðasta holl í Kjarrá fékk reyndar 113 á þremur dögum, sem var alveg prýðilegt, en nú hafa veiðst um 30 laxar á hvoru svæði á síðustu tveimur dögum,“ segir hann og bætir við að í hverju holli veiðist nokkuð af stórlaxi, frá 80 cm upp í rúmlega 90.

Stórstreymt er í dag og hafa laxagöngur víðast hvar verið góðar síðustu daga. Árni Friðleifsson, umsjónarmaður við Laxá í Dölum, sagði í gær að þar biðu menn reyndar enn eftir stóru göngunni en fínt vatn er í ánni.

„Laxinn sem kemur inn gengur hratt upp ána, við vorum að fá lúsuga fiska innst í Svartafossi,“ sagði Árni í gær og bætti við að síðasta holl hefði fengið 30 laxa á stangirnar sex. Tæplega 100 laxar hafa veiðst í Laxá sem er umtalsvert minna en í fyrra, er 400 höfðu veiðst á sama tíma.

„Það er frábær veiði hér í Breiðdalsá,“ sagði Þröstur Elliðason í gær en sjá má í rafrænu veiðibókinni á vef hans, Strengir.is, að nær 400 laxar höfðu þá veiðst, og margir vænir þar á meðal. Þá hafa um 150 veiðst í Jöklu, sem Þröstur er líka hæstánægður með, en hann segir að veiðin byggist enn á tveggja ára laxi eins og annars staðar á Austurlandi.

Um 100 laxar hafa veiðst í Hrútafjarðará en í rigningu síðustu daga komur góður kippur í veiðina og fékk síðasta holl 17 laxa.