Knattspyrnumaðurinn Andrés Már Jóhannesson hefur verið seldur frá Fylki til norska úrvalsdeildarfélagsins Haugasunds. Andrés Már er 22 ára gamall og hefur verið einn besti leikmaður Fylkis. Í samtali við Morgunblaðið fyrir helgi sagðist hann ánægður með þetta skref á ferlinum en Andrés mun eflaust reynast góður liðsstyrkur fyrir Haugasund sem er í 8. sæti deildarinnar með 23 stig líkt og 3 önnur lið.
Víkingar hafa fengið til sín skoska miðvallarleikmanninn Colin Marshall frá BÍ/Bolungarvík fyrir komandi átök í fallbaráttunni í Pepsi-deild karla í knattspyrnu. Marshall er 26 ára gamall og kom til Djúpmanna í vetur frá spænska 4. deildar liðinu Crevillente Deportivo eftir að hafa leikið með fjölda liða í ensku utandeildinni og í Skotlandi. Marshall ólst upp í röðum Aston Villa en lék ekki með aðalliðinu.