Foreldrar Sturlu Þórs Friðrikssonar, sem lét lífið eftir fluglys í Skerjafirði árið 2000, hafa fært gjörgæsludeild Landspítalans í Fossvogi að gjöf sjónvarp, DVD-tæki og nokkra mynddiska til minningar um hann.
Sturla Þór var samanlagt í þrjá mánuði á gjörgæsludeildinni. Hann var sonur Kristínar Dýrfjörð og Friðriks Þórs Guðmundssonar. Í tilkynningu frá spítalanum kemur fram að þegar Kristín varð fimmtug í lok júní hafi hún beðið fólk um að leggja fé í söfnunarbauk í stað þess að gefa gjafir. Í samráði við deildarstjóra gjörgæslunnar, Kristínu Gunnarsdóttur, hafi hún ákveðið að nota peninga í ofangreinda gjöf.