Pétur Stefánsson hlustaði á Jóhönnu Sigurðardóttur forsætisráðherra í Kastljósinu á þriðjudag. „Allt á uppleið, ekkert á niðurleið. Allir hafa það gott,“ hafði hann eftir henni og orti:
Efnahagslífið eflast mun,
sem atvinna margra greina.
Allt er í blóma eftir hrun,
„ekki er því að leyna“.
Kristján Hreinsson fylgdist með setningu Alþingis og gat ekki á sér setið:
Trausti er ríkisstjórn rúin,
ráðherrar læðast með veggjum
og moldríka forsetafrúin
er farin að kasta eggjum.
Séra Hjálmar Jónsson bætti við:
Úti voru eggjasóðar,
inni messur settar.
Bil er milli þings og þjóðar,
þings og Hæstaréttar.
Sigrún Haraldsdóttir prjónar við:
Ýfir margra garpa geð
geil í svefni og vöku,
bilið reyna að brúa með
blautri eggjaköku.
Davíð Hjálmar Haraldsson heyrði af forstjóraskiptum hjá Iceland Express:
Fáu er í fréttum logið;
fékkst á hreint
að áfram getur Express flogið
allt of seint.
Ingólfur Ómar Ármannsson laumaði vísu til Vísnahornsins:
Léttir trega, lífgar brá,
líkt og dæmi sanna,
stakan snjalla ítök á
enn í hugum manna.
Pétur Blöndal pebl@mbl.is