Brids - Guðmundur Páll Arnarson | ritstjorn@mbl.is

Ítölsk innansveitarkróníka.

Stærstu bridsfélög Ítala keppa árlega um réttinn til að taka þátt í bikarkeppni Evrópu (Champions Cup). Úrslitaleikurinn í ár var sýndur á Bridgebase fyrir skömmu, en þar áttust við Allegra-klúbburinn frá Tórínó og Angelini frá Róm. Í Allegra-liðinu spiluðu Lauria, Versace, Bocchi, Madala, Duboin, Sementa, Giubilo og Zaleski – átta manna lið á móti fjórmenningum Angelini, þeim Fantoni, Nunes, Cima og sjálfum Garozzo.

Allegra-sveitin sigraði örugglega, en heppnin var óneitanlega með þeim í spilinu að ofan. Lauria og Guibilo slysuðust upp í 7♦, sem vinnast út á hagstæða legu í láglitunum. Hinum megin vakti Fantoni í suður á víðáttulaufi og Nunes sýndi skiptinguna í rauðu litunum með heljarstökki í 3♠. Og hvað gat suður gert við því nema segja 3G?