Gellur, kinnar, sauðakjöt og svið

Það er margt í gangi og í mörg horn að líta í mínu starfi. Vinnudagarnir eru oft langir og stundum renna saman dagur og nótt. Vinnan er þó skemmtileg að því leyti að maður horfir alltaf fram á að uppskera þótt það taki langan tíma. Sú tilhugsun er góð,“ segir Árni þegar hann er spurður um starfið. „Stundum finnst mér umræðan helst til svört sem stafar af því að þeir sem blogga um bæjarfélagið horfa mjög pólitískt á okkur. Ýmist vegna álversframkvæmda eða brotthvarfs hersins. Allt sem miður fer hér verður að versta máli en á öðrum stöðum væri því sýndur skilningur. Margt gott fólk hugsar þó vel til okkar og þess vegna höfum við ekki áhyggjur,“ segir Árni.

„Ég hef gaman af því að fást við mat og borða hann. Ég hef unun af íslenskum hefðbundnum mat og er í félagsskap sem heitir Hamsarnir með tilvísun í hamsatólg. Þetta er félagsskapur karla en fæstir okkar mega lengur háma í sig, enda komnir á virðulegan aldur. Nafnið á félagsskapnum er bæði viðvörun en um leið yfirlýsing um að við höfum ánægju af að borða sauðakjöt, síldarbollur, gellur í brúnni sósu með lauk, kinnfisk og að halda sviðaveislur. Við félagarnir hittumst mánaðarlega og höldum jafnvel neyðarfundi ef einhver er á leið til útlanda. Þessi félagsskapur höfðar ekki mikið til kvenna,“ segir Árni. „Bæði eiginkona mín og dætur eru miklir matargerðarsnillingar en þar er hollustan höfð í fyrirrúmi,“ bætir hann við.

Þegar Árni er spurður hvort hann eldi sjálfur svarar hann því til að ekki gefist mikill tími til þess. „Á meðan börnin voru heima lögðum við ríka áherslu á að hafa alltaf kvöldmat þar sem allir kæmu saman. Einnig vorum við með fjölskyldukvöld á þriðjudögum en þá hjálpuðust allir að í eldhúsinu. Það lukkaðist sérstaklega vel og hefur gert það að verkum að það er mikill áhugi á matargerð í fjölskyldunni. Yngsti sonurinn, Sigfús, er t.d. sérfræðingur í að gera Crème brûlée og stelpurnar eru afar snjallar í að gera tilraunir í eldhúsinu,“ segir Árni sem á fjögur uppkomin börn en þau hjónin eru tvö eftir á heimilinu. „Þegar fjölskyldan kemur saman taka allir þátt í matseldinni sem er virkilega skemmtilegt,“ segir hann.

Árni segir að eiginkonan, Bryndís Guðmundsdóttir, vinni einnig mikið og sé í stórum verkefnum á sínu sviði. „Þess vegna er ekki mikið um matarboð eða þess háttar nema með fjölskyldunni.“ Árni fer oft í innkaup fyrir heimilið, helst í Bónus eða Nettó en einnig í fiskbúðina við Hringbraut. „Þar fær maður nýjan fisk sem við erum oft með á borðum.“ Árni gefur hér uppskrift af sérstæðum lambakjötsrétti. elal@simnet.is