Eigendur Heyrnartækni hafa afhent Krafti – stuðningsfélagi fyrir ungt fólk, sem greinst hefur með krabbamein, og aðstandendur – styrk að andvirði 537.000 krónur.
Heyrnartækni ákvað í tilefni af tíu ára starfsafmæli fyrirtækisins í júní sl. að leggja góðu málefni lið og láta ákveðna upphæð af hverju heyrnartæki, sem selt var í sumar, renna til Krafts. Með þessu vildi fyrirtækið leggja sitt af mörkum til samfélagsins og hjálpa Krafti að veita ungu fólki, sem gengur í gegnum erfiða lífsreynslu, stuðning og hjálp.
Kraftur hefur lagt áherslu á að efla stuðningsnet félagsins og ákveðið að styrkurinn frá Heyrnartækni renni þangað. Stuðningsnetið býður fólki, sem hefur nýlega greinst með krabbamein, og aðstandendum að komast í samband við einhvern sem hefur gengið í gegnum svipaða reynslu.
Stuðningsfulltrúarnir hafa farið á sérsniðið námskeið hjá Gyðu Eyjólfsdóttur, sálfræðingi Krafts.
Til baka
Leita í greinasafni
Prenta grein
