Anna Lilja Þórisdóttir
annalilja@mbl.is
Fargjöld í innanlandsflugi hækka og rekstur Flugfélags Íslands verður erfiður þegar hækkanir á lendingar- og farþegagjöldum á Reykjavíkurflugvelli verða að veruleika á næsta ári. Þetta segir Árni Gunnarsson, framkvæmdastjóri Flugfélags Íslands.
Hækkanirnar nema 250 milljónum, þær eru samkvæmt samgönguáætlun til næstu fjögurra ára og eiga að koma til framkvæmda í tveimur jafnstórum áföngum 2012 og 2013. Þetta verður nýtt í framkvæmdir og viðhald.
Árni segir gjaldahækkunina ekki hafa verið kynnta forsvarsmönnum flugfélagsins. Hann segist hafa átt von á einhverjum hækkunum um áramótin, en að þær yrðu nokkru minni. „Við lásum í samgönguáætluninni að okkur ber að borga 250 milljónum meira til hins opinbera. Þetta mun augljóslega hafa áhrif á fargjöldin til hækkunar, það er alveg ljóst. Það er ekkert óeðlilegt við að gjöld hækki í samræmi við verðlag og annað slíkt. En að hækkunin yrði í þessum stærðarflokki; því áttum við engan veginn von á. Þetta verða 125 milljónir á næsta ári og hefur veruleg áhrif á reksturinn.“
Margvísleg gjöld lögð á félagið
Að sögn Árna hafa ýmis gjöld verið lögð á félagið undanfarin ár. Erfitt sé að sjá hversu lengi það geti haldið áfram. „Það er verið að tvískatta okkur vegna kolefnisblásturs; bæði vegna útblásturs á eldsneyti sem við greiðum til ríksins og frá janúar 2012 þurfum við að borga samkvæmt evrópsku kerfi, ETS. Síðan hafa bæði lendingar- og farþegagjöld hækkað á okkur og skattar á eldsneyti og eldsneytisverðið sjálft hefur hækkað.“ Árni segir takmörk fyrir því hvað markaðurinn geti þolað í verðhækkunum. „Þetta fer beint út í verðið. Ef það verður of hátt, þá fáum við miklu færri farþega. Það má heldur ekki gleyma að þetta hefur mikil áhrif á búsetu og verslun á landsbyggðinni.“Margir þættir hafa áhrif á fargjöld, að sögn Árna. „Allir kostnaðarliðir hafa áhrif á verðmyndunina; rekstrarkostnaður, eldsneyti, viðhald og opinber gjöld, svo eitthvað sé nefnt.“
Undanfarin tíu ár, eða þar um bil, hefur félagið verið rekið án taps. „Þetta hefur verið gríðarlega erfitt, sérstaklega undanfarin þrjú ár í kjölfar hrunsins. Farþegum fækkaði verulega árin 2009 og 2010, en í ár hefur verið hæg aukning. En maður sér ekki fram á að það muni halda áfram ef kostnaður eykst svona mikið,“ segir Árni. 18
FLUGFÉLAG ÍSLANDS