Barnabækur

Hér segir frá fiðlu sem leitar að hinum eina sanna listamanni til að leika á sig. Hún þráir að verða talin besta fiðla í öllum heiminum. Fiðlan ferðast milli eiganda í aldaraðir en enginn kann að ná því besta út úr henni. Aumingja fiðlan verður gömul en trúir samt sem áður á að einn daginn birtist fiðlusnillingurinn. Svo rennur örlagastundin upp og hinir hljómþýðu tónar hrífa hvern þann sem heyrir. Fiðlan nær því markmiði sínu að verða fræg.

Sagan er í anda barnabóka eins og Gr æna hattsins auk ævintýra þar sem beðið er eftir riddaranum á hvíta hestinum. Sagan er aftur á móti svolítið einsleit, biðtími fiðlunnar er of langur og lítið gert svo úr því þegar hún loksins finnur sinn fiðlusnilling. Myndirnar eru einfaldar en þær eru svolítið „fullorðins“, á þeim sjást aðeins eldri menn. Auk þess hefði mátt sleppa því að hafa fiðluna með sítt hár þó það sé líklega gert til að undirstrika að fiðlan er kvenkyns. Á hana leika aðeins karlmenn og fiðlusnillingurinn hjúfrar sig að henni eins og elskunni sinni, hann er prinsinn hennar og fiðlan þráir að renna saman við hann í eina sál.

Sagan er einföld, textinn ágætur og boðskapur sögunnar, að fylgja draumum sínum staðfastlega eftir, hvetjandi fyrir börn.

Litla ljúfa Skrímsla

***½-

Í Litla ljúfa Skrímsla segir frá Skrímslu, sem er nú bara hún Anna litla, sem lætur stundum hafa svolítið mikið fyrir sér. Hún vekur pabba sinn á nóttunni með allskonar veseni, þá sullar hún matnum sínum út um allt, lætur köttinn ofan í klósettið og grætur og bítur. Skrímsla er uppátækjasöm eins og óvitar eru. Pabbi hennar á erfitt með að hemja hana og þarf að þola ýmislegt. En það er allt í lagi því hann elskar Srímslu sína og vill allt fyrir hana gera.

Þetta er einföld og skemmtileg saga fyrir yngstu börnin. Teikningarnar eru nútímalegar, litríkar og fínar. Textinn stuttur og skýr. Það eiga allir eftir að hafa gaman af að lesa þessa bók saman, börnin geta auðveldlega sett sig í spor Skrímslu og foreldrarnir pabbans.

Rafael: Engillinn sem valdi að koma til jarðar

****-

Rafael er lítill hamingjusamur engill. Honum líður illa að sjá þjáningju barnanna sem búa á jörðinni og fær leyfi til þess að heimsækja jörðina. Hann vill kenna börnunum að þekkja góðar tilfinningar og velja rétt. Hann dvelur hjá góðum hjónum og fer í skóla eins og önnur jarðarbörn. Rafael opnar augu krakkana í skólanum fyrir ýmsu, kennir þeim víðsýni og kærleika og hvernig má bætir líf annarra í kringum sig með því að samgleðjast, fyrirgefa, sýna umburðarlyndi og hafa trú, von og kærleik að leiðarljósi. Rafael bætir líf allra sem hann hittir á jörðinni.

Sagan minnir okkur á það sem við eigum til að gleyma alltof oft – mannkærleik. Vatnslitamyndirnar sem skreyta bókina eru mjög vel gerðar og viðeigandi.

Þetta er afskaplega falleg saga með fallegum boðskap sem er settur fram á auðskiljanlegan hátt fyrir unga lesendur.

Góðir siðir: Heilræðavísur fyrir börn á öllum aldri

***½-

Margar góðar heilræðavísurnar hafa verið samdar og notaðar til að siða okkur til í gegnum aldirnar. Nýsamdar heilræðavísur eru sjaldséðnari í dag en nú hefur Pétur Stefánsson sent frá sér lítið kver fullt af vísum með uppeldislegu gildi fyrir börn á öllum aldri. Það er tekið á eigingirni, vinsemd og hjálpsemi, þá er ýmislegt brýnt fyrir lesendum sem á það til að fara fyrir ofan garð og neðan hjá fólki, t.d. að hirða upp skítinn eftir hundana sína, fara varlega í umferðinni, muna eftir að bursta tennurnar og þvo hendurnar eftir klósettferðir. Vísurnar eru vel samdar hjá Pétri; léttar, oft skemmtilegar og boðskapurinn kemst vel til skila. Úrklippumyndir Baldurs hæfa líka vel þessu riti og undirstrika boðskap vísnanna. Þetta er góð bók fyrir börn og foreldra að lesa saman, vísurnar fá börnin til að hugsa út í ýmislegt í hegðun sinni og foreldrarnir geta þá verið til taks og útskýrt hlutina. Bókin fær þá líka til að hugsa út í margt sem tengist uppeldinu og því að vera góð fyrirmynd.

Kýrin sem kunni ekki að baula

og kettlingurinn sem vildi

Bókin skiptist í fyrri og seinni kapítula. Í þeim fyrri segir frá kú sem kemur einn daginn á sveitabæ. Hún getur ekki baulað og hjálpa hin dýrin á bænum henni við að ná upp úr sér bauli með ýmsum aðferðum. Í síðari kapítula segir frá kettlingi sem fæðist á sama sveitabæ og hagar sér ekki eins og aðrir kettir. Honum finnst ekki nógu spennandi að mjálma og apar því eftir hegðun annarra dýrategunda.

Sagan um kúna er að hluta í bundnu máli. Það tekst stundum vel til en gerir söguna líka stundum flóknari og textann óliprann í lestri. Í textanum er ýmist talað um kú eða belju, eftir því hvort rímar betur. Höfundurinn hefði bara átt að halda sig við kúna. Þótt belja sé orðið algengara í talmáli í dag er kýr fallegra og réttara ritmál. Textinn í sögunni um kettlinginn er í óbundnu máli og mikið betri í lestri en sá í bundnu máli, sú saga er líka liprari á allan hátt.

Myndirnar eru afskaplega litríkar og lifandi og það er mjög mikið að gerast á hverri opnu, of mikið stundum svo myndirnar verða óreiðukenndar og óskiljanlegar. Teiknarinn afbakar dýrin og gerir þau óþekkjanleg með einhverjum stælum. Myndirnar eiga það til að vera harðar og fráhrindandi sem er ókostur í barnabók.

Boðskapurinn í bókinni er góður; samfélagið sættist aldrei á þá sem eru öðruvísi og reynir að steypa þá í það mót sem þykir viðeigandi. Þegar upp er staðið er samt bara best að vera maður sjálfur.

Strákurinn sem týndi jólunum ***½-

Ingi Hrafn Hilmarsson og Jóel Ingi

Hér ræðir um átta litlar bækur sem koma allar saman í pakka. Í fyrstu bókinni hefur álfur söguna af stráknum Jónatani sem er komin með nóg af jólastússinu og ákveður að finna stað þar sem að jólin eru ekki til. Álfurinn eltir Jónatan og lætur hann fá verkefni sem leiðir hann í ævintýri þar sem hann hittir m.a dreka og Grýlu. Vitaskuld finnur Jónatan jólaandann í þessari ferð og lærir að verða þakklátur. Bækurnar átta eru merktar einum bókstafi hver svo þær mynda orðið Jólasaga. Sagan er byggð á leikriti sem Leikhópurinn vinir sýndi á leikskólum árið 2009. Þetta er skemmtileg jólasaga sem höfðar sterkt til barna og ekki skemmir fyrir að hafa hana í litlum handhægum bókum sem gera lesturinn enn meira spennandi.