Viðamikil bresk rannsókn bendir til þess að andlegri getu manna taki að hraka eftir 45 ára aldur, mun fyrr en margir hafa talið.
Rannsóknin náði til yfir 7.000 opinberra starfsmanna í Lundúnum og stóð í tíu ár, að því er fram kemur í nýjasta hefti British Medical Journal .
Þátttakendurnir, 5.198 karlar og 2.192 konur, gengust undir þrjú próf á tíu árum til að hægt yrði að meta minni þeirra, orðaforða og skilning á töluðu og rituðu máli. Rannsóknarmennirnir komust meðal annars að þeirri niðurstöðu að andlegri getu karla og kvenna á aldrinum 45-49 ára hrakaði um 3,6% að meðaltali á tímabilinu. Andlegri getu karla á aldrinum 65-70 ára hrakaði um 9,6% en kvenna á sama aldri talsvert minna, eða um 7,4%.