BRIDS - Guðmundur Páll Arnarson | ritstjorn@mbl.is

Sveitakeppni í Seattle. V-Enginn.

Á síðasta degi haustleikanna í Seattle tók landsliðsmaðurinn Joel Wooldridge upp ágæta hönd vesturs og opnaði á Standard-tígli. Norður doblaði, austur sagði 2♣ og suður 2♥. Joel doblaði nú til að sýna góða opnun og fyrir vikið frétti makker hans aldrei af sexlitnum í tígli og þagði það sem eftir lifði sagna: norður lyfti í 3♥, suður í 4♥ og Joel doblaði.

Útspilið var ♣3. Sagnhafi stakk upp ás, tók ♥Á og spilaði síðan spaða – tían frá austri (talning) og kóngur hjá sagnhafa. Framhaldið virðist óhjákvæmilegt: einspil vesturs í laufi gerir það að verkum að sagnhafi nær að fría spaðann og losa sig við laufhundinn heima. Joel sá hvað verða vildi og lét ♠G undir kónginn! Sagnhafi yppti öxlum, spilaði spaða að blindum, sexan frá Joel og ... áttan úr borði.