Hollenska knattspyrnufélagið AZ Alkmaar hefur framlengt samning sinn við landsliðsmanninn Jóhann Berg Guðmundsson til vorsins 2014 en hann átti að renna út næsta vor. Frá þessu var skýrt á vef AZ í gær og þar kemur fram að félagið hafi nýtt sér ákvæði í samningnum til framlengingar. „Við erum mjög ánægðir með þróun Jóhanns. Hann hefur vissulega ekki átt fast sæti í byrjunarliðinu á þessu tímabili en hann er mjög nálægt því. Við teljum að Jóhann eigi mikið inni og sé AZ mjög dýrmætur,“ sagði framkvæmdastjórinn Earnest Stewart á vef félagsins. Jóhann, sem er 21 árs, hefur spilað 53 leiki með aðalliði AZ og skorað í þeim sjö mörk.
ÍR-ingar hafa fengið tvo frjálsíþróttamenn í sínar raðir á síðustu dögum. Sigurður Lúðvík Stefánsson, 24 ára spretthlaupari úr Fjölni, og Tómas Zoëga , 18 ára millivegalengda- og langhlaupari úr Breiðabliki, hafa gengið frá félagaskiptum yfir í Breiðholtsfélagið. Þeir hafa báðir æft af krafti með ÍR-ingum í vetur. Nokkuð hefur verið um félagaskipti í frjálsíþróttum síðustu daga.
S tefán Gíslason knattspyrnumaður er á reynslu þessa dagana hjá belgíska fyrstudeildarliðinu Oud-Heverlee Leuven sem er í 12. sæti efstu deildarinnar í Belgíu. Stefán er samningslaus eftir nokkurra mánaða veru hjá Lilleström í Noregi og það gæti skýrst á allra næstu dögum hvort hann semur við félagið.
Skautafélag Reykjavíkur hefur endurheimt landsliðsmanninn Pétur Maack frá Svíþjóð. Pétur var lykilmaður hjá SR á síðasta keppnistímabili en spilaði í haust með Osby í Svíþjóð. Hann er nú kominn heim í Laugardalinn á nýjan leik og mun að líkindum ljúka tímabilinu með SR. Hann lék sinn fyrsta leik með SR á tímabilinu á fimmtudagskvöldið þegar liðið tapaði fyrir SA Jötnum eftir framlengdan leik. Pétur skoraði í leiknum og gaf tvær stoðsendingar.
Oddur Gretarsson , hornamaður frá Akureyri, og Aron Rafn Eðvarðsson , markvörður úr Haukum, voru á meðal áhorfenda á leik Íslendinga og Pólverja á alþjóðlega æfingamótinu í handknattleik í Danmörku í gær. Hinir 16 leikmennirnir sem Guðmundur Þórður Guðmundsson landsliðþjálfari valdi til þess að taka þátt í leikjum mótsins voru á leikskýrslu í gær. Ólafur Bjarki Ragnarsson, leikmaður HK, og Ólafur Andrés Guðmundsson, leikmaður Nordsjælland, voru þeir einu af 16 manna hópnum sem voru á skýrslu sem komu ekkert inn á leikvöllinn.