Þjóðskáldin láta að sér kveða á Baggalúti eins og fyrri daginn. Í þetta skipti er það Davíð Stefánsson með Kvæðinu um ísana og ekki laust við að áhrifa gæti úr öðru og þekktara kvæði skáldsins:
Snert fésbók mína, femínistadís
svo fái ég mér aldrei strákaís.
Við stöðu mína kát þú kommentar
um kynjahalla mjókuriðnaðar.
Ef fávitar sem fitla netið við
hin femínísku gildi setja á bið.
Þú karlrembur þá kallar, nógu hátt
þá klæða þeir sig aldrei meir í blátt.
Ég heyri á fésbók villtan veggjaþyt
frá valkyrjum sem eru alveg bit.
Snert fésbók mína, femíníska dís
svo fái ég mér kynjafnaðan ís.
Þórarinn Guðmundsson, sem sendi frá sér ljóðabókina Andvarahvísl í haust, kastar líka frá sér stökum við ýmis tilefni. Stjórnmálavafstur er yfirskrift þessarar vísu:
Eins og bleyða á ystu tröð
í átaksgreiðum flaumi
yfir reið hann öll sín vöð
undan breiðum straumi.
Og um jafntefli á heimsmeistaramóti:
Í knattleik var feiknarlegt hark,
í hausunum þrumur og skark.
Þótt gæfu þeir gríðarleg spörk
þá gerðu þeir samt engin mörk.
Bjarki M. Karlsson orti dýrt á dögunum að gefni tilefni:
Nú er kalt og kólnar allt,
kóf margfalt með hagli.
Vita skaltu að víst er svalt
og vont er salt frá Agli.
Pétur Blöndal pebl@mbl.is