Skúli Jón Sigurðarson sendi Vísnahorninu kveðju með skemmtilegum limrum, sem ortar eru í tilefni af öllum þemadögunum sem þjóðin fær yfir sig þessa dagana. Hjálmar Freysteinsson orti:
Bollur skal éta á bolludaginn,
baunir og saltkjöt á sprengidaginn,
en iðrast hann má,
maðurinn sá,
sem át konuna sína á konudaginn.
Þá Ólafur Halldórsson:
Bollur skal éta á bolludaginn,
baunir og saltkjöt á sprengidaginn,
en þótt hugur sé sá,
ekki húsfreyjan má,
hafa bóndann í matinn á bóndadaginn.
Og Björn Ingólfsson:
Ef bollur skal éta á bolludaginn,
og baunir og saltkjöt á sprengidaginn,
þá er mér spurn,
spekingar: Hvurn,
andskotann étiði á öskudaginn?
Loks Kristján Eiríksson:
Ég bollurnar ét á bolludaginn,
og baunir og saltkjöt á sprengidaginn,
svo fæ ég mér bjór
og byrja mitt þjór,
og verð öskufullur á öskudaginn.
Pétur Blöndal pebl@mbl.is