Hrafnhildur Erla Sigurðardóttir fæddist á Landspítalanum í Reykjavík 26. október 1942. Hún lést á hjúkrunarheimilinu Grund 30. janúar 2012.

Foreldrar Erlu eru Bergljót Haraldsdóttir, f. 6. desember 1922, og Sigurd Evje Markússon, f. 6. ágúst 1918, d. 9. maí 1991. Erla var elst af sjö systkina hópi.

Erla ólst upp í Svartagili í Þingvallasveit en fluttist síðar til Reykjavíkur.

Erla var kvödd frá Þingvallakirkju 8. febrúar 2012.

Nú hefur elskuleg mágkona mín Erla Sigurðardóttir kvatt þessa jarðvist.

Ég kynntist Erlu fyrir rúmum 30 árum þegar ég og bróðir hennar Jón Friðrik, eða Nonni eins og hún kallaði hann alltaf, vorum að draga okkur saman.

Með okkur Erlu tókst strax mikil og góð vinátta og vorum við ávallt í góðu sambandi, bæði í síma og eins heimsótti ég hana eins oft og ég gat. Erlu tókst því miður aldrei að heimsækja okkur eftir að við fluttum austur en hún átti við veikindi að stríða árum saman. Það var alltaf gaman að koma til Erlu, við gátum alltaf fundið eitthvað til að hlæja að og gestrisin var hún mjög og fékk ég, sælgætisgrísinn, alltaf margar tegundir af súkkulaði með kaffinu.

Erla var einstaklega falleg, hlý og góð kona með hjarta úr gulli og vildi allt fyrir alla gera og gefa allt sem hún átti.

Með þessum orðum kveð ég þig elsku Erla mín.

Ég sendi fjölskyldu Erlu svo og öllum ástvinum hennar innilegar samúðarkveðjur.

Kolbrún

Kristjánsdóttir.