Valur hafði betur gegn Íslandsmeisturum Stjörnunnar, 2:0, í fyrsta leik liðanna í A-riðli Deildabikarkeppni KSÍ, Lengjubikarnum, í knattspyrnu en leikurinn fór fram í Kórnum í Kópavogi í gærkvöldi.
Rakel Logadóttir skoraði fyrra mark Hlíðarendaliðsins í fyrri hálfleik og undir lok leiksins bætti varamaðurinn Hugrún Arna Jónsdóttir við öðru marki fyrir Valsara.
Stjarnan átti tvö stangarskot í leiknum en Garðabæjarliðið á titil að verja. Liðið hafði betur á móti Val í úrslitaleik deildabikarkeppninnar í maí á síðasta ári, 2:1, og fylgdi því svo eftir með því að hampa Íslandsmeistaratitlinum um haustið. gummih@mbl.is