Forstjóri Alþjóðagjaldeyrissjóðsins, Christine Lagarde, hefur viðurkennt að óvíst sé hvort samkomulag muni nást fyrir apríl á meðal aðildarþjóða sjóðsins um að leggja fram 500 milljarða Bandaríkjadala til að stemma stigu við skuldakreppunni á evrusvæðinu.
Lagarde lét þessi ummæli falla eftir fund fjármálaráðherra G20-ríkjanna í Mexíkóborg í fyrrakvöld. Fram kom í tilkynningu eftir fundinn að fjármálaráðherrar tuttugu helstu iðnríkja heims setja það sem skilyrði að björgunarsjóður evrusvæðisins verði efldur enn frekar, ef önnur ríki utan Evrópu eigi að taka þátt í björgunaraðgerðunum með því að auka fjárframlag sitt til Alþjóðagjaldeyrissjóðsins.
Ljóst er að yfirlýsingin mun setja aukinn þrýsting á ráðamenn Þýskalands sem hafa fram til þessa lagst gegn því að stækka björgunarsjóðinn.
Fjármálaráðherrar G20-ríkjanna bentu ennfremur á að ekki mætti búast við því að fjármagn til Alþjóðagjaldeyrissjóðsins verði aukið á sama tíma og ekki liggur fyrir skýr stefna um það hvernig eigi að fást við þá djúpstæðu skuldakreppu sem herjar á mörg ríki evrusvæðisins. hordur@mbl.is