„Mér finnst að eftir hrunið sé fólk miklu duglegra að fylgjast með miðunum sínum en áður,“ segir Stefán Konráðsson, framkvæmdastjóri Íslenskrar getspár. Máli sínu til stuðnings bendir hann á að síðasti stóri vinningurinn sem ekki var sóttur kom upp í lottói árið 2008, en hann var upp á 17 milljónir króna. Vinningurinn rann því ári síðar til starfsemi eigenda fyrirtækisins. Á síðasta ári greiddu lottó og víkingalottó samtals um 1.276 milljónir í vinninga.
Stefán segir að allra vinninga í getraunum sé vitjað, en í lottóleikjunum séu um 5% af smærri vinningum, þúsund króna og minni, ekki vitjað. Hann segir að fólk fylgist vel með og fyrirtækinu sé umhugað um að minna fólk á skoða miðana sína. Að auki spili stór hluti viðskiptavina á netinu og þar sé auðveldara að fylgjast með því hvort fólk sæki vinninga sína.
Á morgun, laugardag, verður lottóvinningurinn fjórfaldur og með marfgföldum vinningum eykst þátttaka. Stefán segir að fjöldi margfeldisvinninga sé í samræmi við reiknilíkan og fátt sem komi á óvart. Undantekningin frá reglunni sé þó ofurtalan sem ekki gekk út í rúmar 30 vikur í fyrra. Líkanið gerir ráð fyrir að hún sé dregin út á 6-8 vikna fresti.
Sú tala sem oftast hefur verið dregin út í íslenska lottóinu frá upphafi þess árið 1982 er talan 21, sem Ásdís Rán minnti rækilega á í sjónvarpsauglýsingum. aij@mbl.is