Brýnt er að hver maður fái verkefni við hæfi til að kraftarnir njóti sín til fulls og árangurinn verði sem mestur, jafnt fyrir einstaklinginn sem samfélagið í heild sinni.
Þess vegna var sjálfsagt og eðlilegt að umhverfisráðherra skipaði Mörð Árnason formann starfshóps um myrkurgæði.
Fáir þekkja betur til myrkraverka og leita þyrfti inn í sjálfa ríkisstjórnina til að finna fjölkunnugri myrkraverkamenn.
Félagar hans í Samfylkingunni hafa til að mynda ekki gleymt því hvernig hann varð þingmaður nú síðast þrátt fyrir að hafa ekki náð kjöri.
Baráttan sem hann háði fyrir núverandi þingsæti sínu þoldi ekki dagsbirtuna en verður ef til vill um síðir upplýst eins og viðeigandi væri.
Þá kemur í ljós hvaða aðferðir honum þóttu sæmandi gagnvart flokkssystur sinni í eigin þágu.
Ennfremur er upplýsandi í þessu sambandi að horfa til atkvæðagreiðslunnar í landsdómsmálinu í september 2010. Þar glitti í eitt myrkraverkið sem lengi verður í minnum haft.
Svandís Svavarsdóttir vissi nákvæmlega hvað hún var að gera því það má treysta því að sjái Mörður ljóstíru í myrkrinu muni hann slökkva hana án tafar.
Til baka
Leita í greinasafni
Prenta grein
