Myndasmiður „Við leggjum mikla áherslu á að hafa albúmið fjölbreytt og skemmtilegt,“ segir Erling sem starfrækir ljósmyndastofu sína á Eiðistorgi á Seltjarnarnesi
Myndasmiður „Við leggjum mikla áherslu á að hafa albúmið fjölbreytt og skemmtilegt,“ segir Erling sem starfrækir ljósmyndastofu sína á Eiðistorgi á Seltjarnarnesi — Ljósm/Erling
Hundastelpa Júlía Steindórsdóttir með hundinn sinn á einstaklega fallegri mynd.
Hopp Andri Búi Sæbjörnsson er einn margra líflegra krakka sem Erling hefur myndað.
<strong>Ballerína</strong> Fjóla Stefánsdóttir tekur spor inn í framtíðina á þeim tímamótum í lífinu.
[ Smellið til að sjá stærri mynd ]
Erling myndar á Eiðistorgi með Sillu konu sinni. Myndaalbúmið fjölbreytt og skemmtilegt. Fyrst myndað á stofunni og síðar úti í náttúrunni. Gróttan er myndrænn staður

Krökkunum þarf að finnast skemmtilegt að mæta í myndatökuna og ljósmyndarinn þarf að vera líflegur. Allt annað er smitandi á verri veginn. Gleðin skín í gegn sé myndatakan stund þar sem allir njóta sín og brosa. Síðustu árin hefur sömuleiðis orðið talsverð breyting á myndunum sjálfum. Þetta er ekki jafn þvingað og áður var og þótti öðrum þræði sjálfsagt,“ segir Erling Aðalsteinsson ljósmyndari.

Þegar náttúran tekur lit

Erling hefur starfað sem ljósmyndari til fjölda ára og starfrækir stofu á Eiðistorgi á Seltjarnarnesi með sambýliskonu sinni, Sigríði Sigurlínu Pálsdóttur, Sillu, sem er förðunarmeistari og stílisti og hefur starfað með mörgum af fremstu ljósmyndurum landsins. Þar sinna þau ýmsum myndatökum og eðlilega eru fermingarmyndatökur snar þáttur í starfi þeirra þegar kemur fram á vorið. Myndatökurnar eru samstarf þeirra beggja.

„Stelpurnar fara gjarnan í prufugreiðslu áður en kemur að fermingunni sjálfri og síðustu árin hefur færst í vöxt að þá séu myndirnar teknar. Nokkrar myndir sem fara í möppu og nokkrar til viðbótar sem fólk fær í skjáupplausn og er hægt að sýna til dæmis á skjávarpa í fermingarveislunni. Þetta fyrirkomulag er vinsælt,“ segir Erling. „Sumir hafa viljað skipta upp myndatökunni og koma í síðari áfanga myndatökunnar síðar á vorinu eða jafnvel um sumarið, þegar náttúran hefur tekið lit. Þá hefur okkur fundist gaman að fara og taka myndir til dæmis hér vestur á Gróttu, enda er umhverfið þar sérstaklega myndrænt. Stundum höfum við líka farið með krökkunum sem hafa áhuga á hestamennsku eitthvað út í sveit eða annars staðar sem hæfir.“

Ein mynd í kyrtli

Að taka myndirnar úti í náttúrunni segir Erling hluta af þeirri þróun sem átt hefur sér stað í fermingarmyndatökum síðustu árin; það er að krakkarnir komi í myndver með einhverja þá hluti sem sýna áhugamál þeirra. Að vera í búningi íþróttaliðsins síns, með gæludýr eða eitthvað sem tengist áhugamáli þeirra er stíllinn í dag.

„Við leggjum mikla áherslu á að hafa albúmið fjölbreytt og skemmtilegt. Í því höfum við kannski bara eina mynd í kyrtli en í gamla daga voru þær myndir fleiri í albúminu. Ég fermdist árið 1974 og á enn til myndirnar af mér með þykkt hárið, bartana og breiða svarta flauelsslaufu. Svona hefur nú tískan breyst rækilega,“ segir Erling.

sbs@mbl.is