Gylfi Arnbjörnsson, forseti Alþýðusambands Íslands, segir sérstökum vaxtabótum ekki hafa verið ætlað að koma sérstaklega til móts við þá sem verst væru settir hvað skuldsetningu varðaði. Þvert á móti hefði þeim verið ætlað að koma til móts við þá sem voru hóflega skuldsettir og nutu ekki annarra úrræða sem stjórnvöld höfðu gripið til í kjölfar fjármálakreppunnar.
Oddný G. Harðardóttir fjármálaráðherra ritaði grein í Morgunblaðið í gær þar sem hún sagði m.a. að úthlutun almennra vaxtabóta hefði verið breytt þannig að þær kæmu í auknum mæli til móts við heimili með þunga skuldabyrði og lágar tekjur.
„Við vorum fyrst og fremst að benda á að þarna var verið að efna til aðgerða fyrir þá sem höfðu vissulega lent í þyngri greiðslubyrði en voru ekki að glíma við óviðráðanlegar skuldir,“ segir Gylfi.
Réttur þessa fólks hefði hins vegar verið skertur á móti með lækkun á eignamörkum, þ.e. frá byrjun árs 2011 hefðu vaxtabætur hjóna fallið niður við 10,4 milljóna króna hreina eign í stað 18,2 milljóna áður.
Í grein sinni segir Oddný að útreikningar ASÍ, sem fjallað var um í Morgunblaðinu á mánudag, ættu aðeins við um 500 fjölskyldur skv. álagningarskrám Ríkisskattstjóra en Gylfi segir það myndu koma sér á óvart ef þetta væri rétt.
„Það eru sem betur fer margar fjölskyldur millitekjufólks sem eiga hreina eign á bilinu 40-50%,“ segir Gylfi. Háir vextir vegna ónýtrar krónu kalli hins vegar á vaxtabætur til handa þessu fólki ekki síður en öðrum.
„Vegna ofurvaxta þurfum við að hafa opinbera aðstoð fyrir meðalfjölskyldur vegna kaupa á meðalhúsnæði,“ segir Gylfi. holmfridur@mbl.is
Til baka
Leita í greinasafni
Prenta grein
