Ekki er seinna vænna fyrir Steingrím J. og félaga að undirbúa hugmyndafræðilega endurreisn Vinstri grænna eftir að hafa horfið frá öllum helstu stefnumálum sínum frá síðustu kosningum.
Nú hefur verið ákveðið að leita til upprunans og í því skyni hefur verið settur á fót leshringur á vegum Vinstri grænna um marx-lenínisma.
Þetta er vitaskuld mikilvægt innlegg í íslensk stjórnmál líðandi stundar enda ekki fullvíst að stefna ríkisstjórnarinnar í atvinnu- og efnahagsmálum dugi til lengdar til að halda atvinnustigi og hagvexti í skefjum.
Á næsta kjörtímabili er ákveðin hætta á að úr fari að rætast ef ekkert verður að gert og þá er gott að geta leitað í smiðju manna sem bera ábyrgð á mestu manngerðu hörmungum sögunnar.
Víst má telja, þó að leshringurinn sé á vegum Vinstri grænna, að leitað verði til helsta aðdáanda Leníns hér á landi, Lúðvíks Geirssonar, þingmanns Samfylkingarinnar, um samlestur.
Þá er sjálfsagt fyrir Steingrím J. og félaga að hafa í huga, þegar flokksmenn hafa lokið við að stauta sig í gegnum verk fyrrnefndra foringja, að í Seðlabankanum eru í forystu menn sem gætu lagt gott til mála ef víkka þyrfti út lesefnið.
Ástæðulaust er fyrir VG að horfa framhjá kenningum virtra fræðimanna á borð við Maó og Trotskí.
Til baka
Leita í greinasafni
Prenta grein
