Það er hættulegt að þegja of lengi

Kristín Heiða Kristinsdóttir

khk@mbl.is

Mig hefur alltaf langað til að verða leikari og ég stefni að því að fá að leika aðalhlutverk á stóra sviðinu í Borgarleikhúsinu og í Þjóðleikhúsinu,“ segir Esther Helga Klemenzardóttir ellefu ára sem veit greinilega hvað hún vill, rétt eins og hún Lína Langsokkur sem hún leikur í samnefndu leikriti sem Leikfélag Hveragerðis sýnir um þessar mundir. Esther hefur vakið mikla athygli fyrir góða frammistöðu í hlutverkinu, enda kann hún vel við sig uppi á sviði.

„Ég hef leikið í helgileik í skólanum mínum og ég hef farið á leik- og söngnámskeið þar sem ég hef verið að leika í leikritum, en þetta er fyrsta alvöruleikritið mitt,“ segir Esther og bætir við að henni finnist ekkert mál að læra og muna textann. „Þegar maður fer með sama textann aftur og aftur í nokkrar vikur er maður ekkert lengi að læra þetta. Við krakkarnir sem leikum Línu, Tomma og Önnu vorum ekki nema tvær vikur að ná textanum okkar.“

Fór í áheyrnarprufu

En hvernig kom það til að hún fékk hlutverkið? „Mamma sagði mér frá áheyrnarprufunum fyrir leikritið og þar sem mér hefur alltaf þótt gaman í leiklist, þá ákvað ég að prófa. Ég skellti mér í prufu og gerði mitt besta. Reyndar var verið að leita að eldri stelpu en mér í hlutverk Línu og ég vonaðist því bara eftir því að fá aukahlutverk. En svo þótti ég passa svo vel í aðalhlutverið að ég fékk það og ég varð alveg rosalega glöð. Það er ótrúlega gaman að taka þátt í svona stórri alvöruleiksýningu, en það getur reyndar líka verið svolítið erfitt að þurfa kannski að gera það sama aftur og aftur, þá verður maður þreyttur.“

Stress-spenna á frumsýningu

Esther segir að frumsýningardagurinn hafi verið stór dagur og mikil upplifun. „Þá var ég bæði spennt og stressuð á sama tíma, þá myndaðist svona stress-spenna, ég get eiginlega ekki lýst þessari tilfinningu, hún var mjög sérstök. En það var samt ótrúlega gaman.“ Esther segir hlutverkið ekki krefjast þess að hún sé ofursterk eins og Lína. „Ég þarf ekki að lyfta hesti, því hesturinn okkar er búinn til úr frauðplasti. En við Lína erum víst dálítið líkar, þó að ég sé ekki rauðhærð eins og hún. Margir segja að ég gæti alveg verið að leika sjálfa mig. Til dæmis þegar ég segi í leikritinu að það sé hættulegt að þegja of lengi, það á mjög vel við okkur báðar, eins og margt annað,“ segir Esther og hlær.

Hún segist hafa þekkt stelpuna Línu Langsokk vel áður en hún tók að sér hlutverkið. „Ég sá leikrit um Línu þegar ég var lítil og svo á ég disk með lögunum sem ég hlusta mikið á. Ég hef líka horft mikið á sænsku gömlu bíómyndirnar um Línu, sem eru rosalega skemmtilegar,“ segir Esther og hvetur alla til að mæta á sýninguna, hún sé svakalega skemmtileg.