Þau láta ekki bílaumferðina trufla sig, hreindýrin sem undanfarna daga hafa haldið sig við þjóðveginn um Fagradal. Hópurinn telur alls um 120 dýr og mun að öllum líkindum halda sig á svæðinu næstu vikur, eða allt þar til kýrnar bera í maí.
Þau láta ekki bílaumferðina trufla sig, hreindýrin sem undanfarna daga hafa haldið sig við þjóðveginn um Fagradal. Hópurinn telur alls um 120 dýr og mun að öllum líkindum halda sig á svæðinu næstu vikur, eða allt þar til kýrnar bera í maí. Þá vilja þær meira næði og halda inn í dali eða upp til fjalla. Skarphéðinn G. Þórisson, náttúrufræðingur hjá Náttúrustofu Austurlands, segir veturinn almennt hafa verið dýrunum góður og þau hafi lítið leitað niður í byggð. Nokkuð af dýrum hafi þó fallið á Suðausturlandi, flest fórnarlömb ákeyrslna. Skarphéðinn segir hreindýrin halda til óþarflega nálægt vegunum en í því samhengi sé skammdegið hættulegast, bæði dýrum og ökumönnum.