Vilhjálmur Andri Kjartansson
vilhjalmur@mbl.is
Í dag sýnir Bíó Paradís stuttmyndina Episode 15 eftir Kitty Von Sometime, höfund The Weird Girls Project. Myndin eða öllu heldur verkefnið heitir fullu nafni The Weird Girls Project – Episode 15: Beauty is only skin deep. Verkið er síðasta verkefni hennar á Íslandi í bili en Kitty fer til Kína í apríl til að vinna að sambærilegum verkefnum og hún hefur unnið að hér á landi í boði Converse China.
Episode 15 er að sögn Kytti ádeila á viðhorf samfélagsins til lýtaaðgerða. „Ég er ekki að segja að lýtaaðgerðir séu alltaf ónauðsynlegar eða eingöngu til að svala hégóma fólks. Það sem ég er að benda á er viðhorf samfélagsins til þeirra. Mér finnst eitthvað að þegar átján og nítján ára stelpur eru að láta stækka á sér brjóstin eða láta setja fyllingu í varirnar og það þykir eðlilegt,“ segir Kitty. Að hennar sögn eru íslenskar konur þær fallegustu í heiminum og lýtaaðgerðir afskræmi íslensku fegurðina. „Ég átta mig á því að fyrir margar konur snýst þetta um vellíðan og ég ætla ekki að gera lítið úr því. Ég er ekki að fara fram á lagasetningu eða á nokkurn hátt að reyna að segja fólki til hvernig það eigi að haga sínu lífi. Ég er eingöngu að segja mína skoðun á þessu og vona að fólk taki skilaboðin til sín.“
Þá bendir Kitty á að öllum aðgerðum fylgi einhver áhætta og að hennar mati ætti fólk ekki að setja sjálft sig í hættu að óþörfu. „Við erum börn einhverra, foreldrar, ástvinir og kunningjar. Það eru alltaf einhverjir sem elska okkur og þykir vænt um og við eigum ekki að stofna sjálfum okkur í hættu fyrir hégóma.“
Kitty tekur það þó skýrt fram að hún átti sig á því að margir þurfi á lýtaaðgerð að halda, t.d. eftir slys eða veikindi.
Í apríl stefnir Kitty til Kína þar sem hún mun vinna að sambærilegum verkefnum og hér á landi. „Ég mun vinna að og gefa út þrjá Episoda í Kína og vinn þá með íslensku hljómsveitinni SYKUR.“
Kitty segir allt öðruvísi að vinna sambærilegt verk í Kína. „Ég hef tvisvar komið til Kína og ég fann strax að fólk er ekki frjálst í sama ljósi og einstaklingar á Vesturlöndum. Samfélagið er samt að breytast þó að það gerist hægt.“
Hugmynd Kitty er að nota listina til að ýta undir það að konur í Kína opni sig meira, sæki á vinnumarkað og í nám. „Konur eru að koma út af heimilinu þó að það sé nokkuð nýtt í Kína og ég vil nota listina mína til að benda á að hjálpa ferlinu að ganga hraðar fyrir sig.“
NÁTTÚRULEG FEGURÐ