Brids - Guðmundur Páll Arnarson | ritstjorn@mbl.is

Gray og redoblin. S-Allir.

Fræg er sagan um frúna sem hélt á trompásnum í vörn gegn alslemmu Harrison-Grays, en doblaði þó ekki. „Af hverju?“ spurði áhorfandi á eftir. „Þér þekkið ekki Harrison-Gray,“ svaraði frúin: „hann redoblar alltaf.“

Þótt sagan sé góð er hún fjarri sannleikanum – Gray var á móti græðgisredoblum. „Ástæðulaust að vara bráðina við með ósköpum og látum,“ segir hann og dregur upp stöðumyndina að ofan sem dæmi.

Suður opnar létt á 1♥ og vestur doblar (þetta var árið 1966). Norður stekkur í 3♥, austur segir 3♠, suður 4♥ og vestur 4♠. Norður doblar og suður passar í von um spaðastöppu hjá makker.

Nú ætti vestur að vera sáttur við sinn hlut, en hann redoblaði í von um feitari bita. Suður tók þá út í 5♥, sem unnust auðveldlega.

„Heimskulegasta redobl allra tíma,“ er dómur Gray.