Birgðir af íslenskum kartöflum frá síðasta hausti eru nokkurn veginn gengnar til þurrðar og byrjað að flytja inn erlendar. Ástæðan er sú að uppskera brást eða var lélegri en í meðalári í mikilvægum kartöfluræktarhéruðum.
Innlenda uppskeran hefur stundum dugað þar til nýjar íslenskar koma á markaðinn um mitt sumar. Guðni Hólmar Kristinsson hjá Sölufélagi garðyrkjumanna segir þó að flest undanfarin ár hafi þurft að flytja inn kartöflur í júní og júlí. Hann segir að nú séu ákveðin skil, birgðir almennt á þrotum þótt einhverjir framleiðendur kunni að eiga eitthvað eftir. Innfluttar kartöflur ættu að vera komnar í búðir.
Bergvin Jóhannsson, formaður Landssambands kartöflubænda, segir að framleiðendum sé sífellt að fækka og þótt aðrir stækki við sig minnki heildarframleiðslan. Þá segir hann að uppskeran hafi ekki verið nægilega góð á síðasta sumri. Þannig hafi uppskeran í Eyjafirði verið innan við helmingur af meðalársuppskeru og aðeins sæmileg uppskera í Þykkvabænum. Betur hafi gengið í Villingaholtshreppi og Hornafirði.
Nýjar íslenskar kartöflur koma á markaðinn í lok júlí, ef tíðin verður þokkaleg. Þangað til þarf að flytja inn erlendar kartöflur. helgi@mbl.is
Til baka
Leita í greinasafni
Prenta grein
