Daði Lárusson, hinn reyndi markvörður Hauka, þurfti loksins að sækja boltann í markið eftir að hafa haldið hreinu í 360 fyrstu mínúturnar á Íslandsmótinu í knattspyrnu. Karl Brynjar Björnsson, miðvörður Þróttara, náði að skora hjá honum og jafna metin í 1:1 í uppbótartíma í leik liðanna í 1. deild karla á Valbjarnarvellinum.
Daði hafði fyrr í leiknum heldur betur lagt sitt af mörkum til að halda hreinu sem lengst því hann varði vítaspyrnu frá Guðfinni Ómarssyni Þróttara í fyrri hálfleiknum. Þá þegar hafði hinn ungi Aron Jóhannsson komið Haukunum yfir.
Þótt Hafnarfjarðarliðið hafi misst af tveimur stigum í blálokin er það áfram efst í deildinni með átta stig eftir fjóra leiki. Nú geta hins vegar Víkingur frá Ólafsvík eða Þór farið upp fyrir Haukana og á toppinn en liðin mætast á Akureyri á morgun.
Helgi næstur því að skora í markalausum leik
Í Efra-Breiðholti voru Víkingar úr Reykjavík í heimsókn hjá Leiknismönnum og sú viðureign endaði með markalausu jafntefli.Þar var hart barist en lítið um tilþrif eða marktækifæri. Það besta fékk hinn þrautreyndi Helgi Sigurðsson. Hann kom inn á sem varamaður hjá Víkingum og átti hörkuskot í stöng þegar stundarfjórðungur var til leiksloka.
Víkingar gerðu þar með sitt þriðja jafntefli í fjórum leikjum og markatalan hjá þeim er 2:1. Leiknismenn eru hins vegar enn án sigurs og sitja á botni deildarinnar með tvö stig, jafnir Þrótti og BÍ/Bolungarvík. vs@mbl.is