Stefán Páll Stefánsson fæddist 28. janúar 1991. Hann lést í umferðarslysi 30. maí 2012.
Hann var sonur hjónanna Huldu Marínar Njálsdóttur, f. 20.3. 1965, og Stefáns Garðars Níelssonar, f. 9.8. 1963. Systkini hans eru: 1) Birkir Freyr, f. 11.8. 1982, giftur Anný Rós Guðmundsdóttur, f. 24.7. 1982. Dætur þeirra eru Lilja Mist, f. 15.4. 2007, og Emma Rós, f. 17.3. 2011. 2) Tvíburasysturnar Rakel Sjöfn og Rósa Dís, f. 4.10. 2000.
Stefán Páll bjó á Hauganesi alla tíð. Hann átti heima í Lyngholti 1, Hauganesi, Dalvíkurbyggð.
Útför Stefáns Páls fer fram í Stærra-Árskógskirkju í dag, 8. júní 2012, klukkan 14.
Elsku besti Stefán Páll, þú ert besti bróðir í heiminum. Við gleymum því aldrei hvað þú dekraðir við okkur og gafst okkur alltaf ís þegar við báðum um. Og það var alltaf svo skemmtilegt þegar þú fórst með okkur út í fótbolta á kvöldin þótt þú hafir oftast unnið okkur. Ég sakna lyktarinnar af gelinu þínu, þú varst algjör töffari. Við munum aldrei gleyma þér og við söknum þín. Elskum þig.
Þínar systur,
Rakel Sjöfn og Rósa Dís.
Elsku bróðir minn, ég skal hafa það stutt.
Hvað getur maður eiginlega sagt? Þú varst orðinn svo hamingjusamur og lífsglaður og þá gerist þetta. Þú varst alltaf öðruvísi en flestir aðrir, en líka betri. Þú varst yndislegur frændi dætra minna. Lilja Mist hættir ekki að tala um þig, en hún segir okkur líka að þetta sé allt í lagi. Þú haldir bara upp á næsta afmælið þitt þarna uppi. Lilja frænka muni passa þig og þú munir passa Hebba fyrir okkur. Hún er bara svo heppin að hún skilur ekki almennilega að þú sért farinn frá okkur. Samt vona ég svo innilega að hún skilji þetta bara betur en ég. Hún man eftir öllum góðu stundunum okkar, sem eru sem betur fer mjög margar. Alltaf áttir þú erfitt með að tjá öllum tilfinningar þínar, nema þá kannski helst mér, og ég veit hvað þér þótti vænt um okkur öll. Eitt það síðasta sem ég gerði með þér var að kaupa blóm handa mömmu. Oft sagðir þú mér að pabbi væri alger snillingur, en ég er ekki viss um að þú hafir nokkurn tímann sagt honum það. En þó svo þú hafir kannski aldrei sagt það þá vitum við öll hvað þú elskaðir okkur. Þú heimsóttir ömmu oftar en við öll hin til samans.
Ég vona að það hafi verið afi sem bað þig um það og að þið bestu vinirnir séuð núna saman, labbandi með hendur fyrir aftan bak.
Sakna þín ólýsanlega.
P.s. Hver á eiginlega að þrífa bílinn minn núna? Þú veist að ég nenni því ekki sjálfur.
Þinn bróðir,
Birkir Freyr Stefánsson.
Allar minningarnar vakna núna hjá mér; brosið þitt, þakklætið hjá þér, húmorinn þinn, góðmennskan og hlýjan sem þú sýndir mér og dætrum mínum og ég mun þakka fyrir alla ævi. Ég lofa þér því að ég mun segja litlu frænkum þínum frá þér, hversu fallegan frænda þær áttu, ég veit að Lilja Mist mun ekki gleyma stóra frænda sínum sem var svo góður við hana og ég vildi óska þess að Emma hefði fengið að kynnast þér líka eins og Lilja Mist. Ég vil að þú vitir að ég mun gera allt sem ég get til að hugsa vel um bróður þinn og fjölskyldu einn dag í einu. Ég veit og trúi því að Lilja systir hafi tekið á móti þér og þið séuð á góðum stað að fylgjast með okkur. Gefðu henni knús og kossa frá mér. Ég kveð þig með miklum söknuði.
Þín uppáhaldsmágkona,
Anný.
Það er erfitt að trúa því elsku Stefán Páll að þú sért farinn frá okkur svona ungur. Ég man svo vel þegar mamma þín gekk með þig og þegar þú fæddist. Ég var svo spennt að fá að sjá þig svo mamma þín sendi mér myndir af þér. Svo hef ég fengið að fylgjast með þér alla tíð síðan.
Ég man svo vel þegar þú ætlaðir að vera í pössun hjá mér, þá u.þ.b. þriggja ára gamall, og mættir galvaskur, búinn að kaupa fína blómaskreytingu sem þú færðir mér. Þú varst mjög ákveðinn ungur drengur og ákvaðst að þú ætlaðir sko ekki að stoppa lengi og gafst ekki upp fyrr en mamma þín sótti þig. Ég hitti þig stundum ekki í langan tíma þar sem ég bý í öðrum landshluta, en alltaf fékk ég fréttir af þér þegar ég heyrði í mömmu þinni. Ef þú svaraðir í símann þegar ég hringdi varstu alltaf tilbúinn að spjalla.
Lífið var ekki alltaf dans á rósum hjá þér, eins og oft er hjá ungu fólki, en ég var nýbúin að fá þær góðu fréttir að allt gengi svo vel, að þú værir svo ánægður með þig og lífið virtist blasa við þér. Mikið finnst manni lífið ósanngjarnt á svona stundum.
Elsku Stefán Páll, ég trúi því að nú sértu kominn á nýjan stað þar sem Níels afi, sem þú saknaðir svo mikið, Sjöfn amma, Njáll afi og aðrir ástvinir hafi tekið vel á móti þér.
Elsku Hulda, Garðar, Birkir og fjölskylda, Rósa og Rakel og aðrir ættingjar og vinir, okkar innilegustu samúðarkveðjur til ykkar. Megi Guð vera með ykkur á þessum erfiðu tímum.
Þar sem englarnir syngja sefur þú
sefur í djúpinu væra.
Við hin sem lifum, lifum í trú
að ljósið bjarta skæra
veki þig með sól að morgni.
Farðu í friði vinur minn kær
faðirinn mun þig geyma.
Um aldur og ævi þú verður mér nær
aldrei ég skal þér gleyma.
Svo vöknum við með sól að morgni.
(Bubbi Morthens)
Svandís Dagbjartsdóttir
og fjölskylda.
Sárt er vinar að sakna.
Sorgin er djúp og hljóð.
Minningar mætar vakna.
Margar úr gleymsku rakna.
Svo var þín samfylgd góð.
Daprast hugur og hjarta.
Húmskuggi féll á brá.
Lifir þó ljósið bjarta,
lýsir upp myrkrið svarta.
Vinur þó félli frá.
(Höf. ók.)
Guð geymi þig elsku Stefán Páll.
Sveinbjörg Rósalind Ólafsdóttir.
Elsku Hulda, Garðar, Birkir, Anný, Lilja, Emma, Rósa og Rakel, missir ykkar er mikill og megi guð vera með ykkur og leiða nú sem endranær.
Hvíldu í friði elsku frændi.
Kveðja,
Íris Rún.
Þar sem englarnir syngja sefur þú
sefur í djúpinu væra.
Við hin sem lifum, lifum í trú
að ljósið bjarta skæra
veki þig með sól að morgni.
Farðu í friði vinur minn kær
faðirinn mun þig geyma.
Um aldur og ævi þú verður mér nær
aldrei ég skal þér gleyma.
Svo vöknum við með sól að morgni.
(Bubbi Morthens)
Við elskum þig,
mamma og pabbi.