Svo sungu hinir síungu Stuðmenn um árið í laginu „Manstu ekki eftir mér?“ Hvort þeir höfðu forseta lýðveldisins, hr. Ólaf Ragnar Grímsson, í huga skal ósagt látið en eins og Tímavélin sýnir glöggt hefði forsetinn skilyrðislaust verðskuldað slíkan brag hér á árum áður, er hann skartaði logagylltum ljónsmakka, tilkomumiklum eins og sjá má. Heldur hefur hárgreiðslan fengið á sig íhaldssamari blæ hin seinni ár en liturinn og grundvallarsveipurinn eru enn á sínum stað.
Eins og hvert mannsbarn veit ganga Íslendingar til kosninga á laugardaginn kemur þar sem kosið er um þá sex einstaklinga sem sækjast eftir kjöri til embættis forseta Íslands. Myndin hér til hliðar er tekin fyrir um 30 árum, þegar Ólafur Ragnar var á svipuðu reki og Þóra Arnórsdóttir, hans helsti keppinautur um embættið, er nú í dag. Nái Ólafur Ragnar kjöri tekst hann á við sitt fimmta kjörtímabil, sem er met í sögu lýðveldisins.
Til baka
Leita í greinasafni
Prenta grein
