María Ólafsdóttir
maria@mbl.is
Daninn Rikke Poulsen útskrifaðist með háa 1. einkunn úr BS-námi í lífefnafræði frá Háskóla Íslands nú í vor. Lokaeinkunn Rikke var 8,8 en hún var ein af fimm nemendum sem í ár hlutu viðurkenningu úr verðlaunasjóði Guðmundar P. Bjarnasonar frá Akranesi. Hlaut Rikke 500 þúsund krónur úr sjóðnum.
„Það er frábært að fá svona stuðning sem námsmaður og í fyrsta skipti sem það hefur borgað sig fjárhagslega að vera duglegur við námið,“ segir Rikke sem hóf nám við Háskóla Íslands árið 2009. Áskorun felst í því að hefja nám á nýju tungumáli en Rikke segir kennara sína hafa reynst sér vel. Eins þyki sér Íslendingar góðir í því að búa til ný orð og íslensku orðin í lífefnafræðinni hafi því flest reynst rökrétt og hægt að giska á hvað þau þýddu.
Meistaranám í Danmörku
Rikke talar góða íslensku en hún á íslenskan kærasta sem hún segir að hafi verið duglegur að tala við sig íslensku. Hún hóf að læra íslensku vorið 2009 en settist þá um haustið á skólabekk og sótti nokkra íslenskukúrsa í Háskóla Íslands til að læra grunninn í málinu. Hún segir íslenskuna hafa verið erfiða til að byrja með en málfærnin hafi komið smám saman.Rikke hefur nú hafið meistaranám í umhverfisefnafræði og heilbrigðisfræði í Danmörku. Í framhaldi af því stefnir hún á doktorsnám og langar í framtíðinni að fást við rannsóknir.
„Þetta er svolítið eins og að vera í eldhúsi þar sem maður prófar sig áfram við að blanda saman hlutum nema þetta er meira spennandi þar sem hlutir geta sprungið og slíkt. Ég hef lent í slíku af og til,“ segir Rikke í léttum dúr.
Spilar öðru hvoru á trompet
Í lokaverkefni sínu kannaði Rikke hvaða áhrif flúor sem fer út í jarðveginn eftir eldgos hefur á umhverfið og lífríkið og þá sérstaklega örverur í jarðvegi. Hún segist gjarnan vilja nýta nám sitt frekar á þennan hátt í framtíðinni með því að færa vísindin meira inn í daglegt líf fólks. T.a.m. með því að skoða áhrif ýmissa efna á matinn sem fólk neytir. Þá umræðu mætti auka hér á landi og sér Rikke jafnvel fyrir sér að geta tekið þátt í slíku hérlendis í framtíðinni. Rikke hefur lítinn tíma aflögu fyrir utan námið en hún spilar þó öðru hvoru á trompet og lék í Lúðrasveitinni Svani meðfram náminu.„Það er gaman að hafa eitthvað annað að gera með náminu. Það er alltaf smáheppni að verða hæst en ég held að ég sé góð í að vinna mikið og reyni að gera mitt besta,“ segir Rikke.
VERÐLAUNASJÓÐUR