Önnur umferð þjóðaratkvæðagreiðslu um nýja stjórnarskrá fór fram í Egyptalandi síðastliðinn laugardag og lagði meirihluti kjósenda blessun sína yfir hana. Stjórnarandstaðan er ósátt við niðurstöðu kosninganna og segir að um kosningasvik sé að ræða.
Fjölmiðlar í Egyptalandi hafa eftir einum af meðlimum Þjóðfrelsisfylkingarinnar í Egyptalandi, sem er stjórnarandstöðuflokkur þar í landi, að flokkurinn hafi beðið yfirkjörstjórn um að fara betur yfir niðurstöður þjóðaratkvæðagreiðslunnar áður en endanleg niðurstaða verður gerð opinber með formlegum hætti í dag.
„Þjóðaratkvæðagreiðslan er ekki endirinn á þessari vegferð heldur er hún einungis einn liður í baráttunni,“ er haft eftir Abdel Ghaffer Shokr, meðlimi í Þjóðfrelsisfylkingunni, og bætir hann við: „Við munum halda áfram að berjast fyrir egypsku þjóðina.“
Að sögn Bræðralags múslima, sem Egyptalandsforseti tilheyrir, og dagblaðsins Al-Ahram studdu 64% kjósenda nýja stjórnarskrá en kosningaþátttakan var um 32%.