Sjóminjar við höfnina

Eiríkur fæddist í Súðavík 24.12. 1962, ólst þar upp til sex ára aldurs og síðan á Akranesi. Hann lauk stúdentsprófi frá Flensborg 1984 og stundaði nám í prentverki um skeið. Hann hóf nám í sagnfræði við HÍ 1989, lauk BA-prófi 1994 og MA-prófi 2005.

Eiríkur stundaði fiskvinnslu á Akranesi á unglingsárunum og í Hafnarfirði á framhaldsskólaárunum og starfaði við Prentsmiðjuna Eddu og Prentsmiðju Morgunblaðsins.

Eftir BA-prófið var Eiríkur safnstjóri Sýslusafns Austur-Skaftafellssýslu á Höfn í Hornafirði 1996-99, var blaðamaður við Morgunblaðið 1999-2002, kynningarstjóri BHM 2002-2004 og sinnti blaðamennsku og ritstörfum á eigin vegum 2004-2005.

Eiríkur hóf störf við sjóminjasafnið Víkina í Reykjavík 2005 og hefur verið stafnstjóri þar frá 2009.

Eiríkur er formaður Sambands íslenskra sjóminjasafna, varamaður í Safnaráði og sat í stjórn FÍSOS, Félags íslenskra safna og safnamanna.

Safnið og gamla höfnin

En hvernig skyldi aðsóknin vera að þessu nýjasta safni borgarinnar?

„Hún hefur verið mjög vaxandi. Safnið byrjaði nánast á núllpunkti hvað varðar muni og húsnæðið var óuppgert gamalt frystihús. Þess vegna fór aðsókn rólega af stað en þeim mun meira var um framkæmdir við að koma safninu á flot. Hins vegar er safnið nú orðið mjög glæsilegt og fjöldi gesta á þessu ári verður um 45 þúsund manns. Það skipti t.d. miklu máli að fá Óðin að safninu en það er sögufrægt skip sem m.a. tók þátt í þremur þorskastríðum og var mikilvægt björgunarskip hér við land.“

Eru erlendir ferðamenn þá í meirihluta safngesta?

„Nei, Íslendingar eru ennþá í meirihluta en erlendum ferðamönnum fjölgar ár frá ári. Hingað kemur líka mikill fjöldi skólabarna sem mörg hver hafa aldrei stigið á skipsfjöl þegar þau koma um borð í Óðin. Þeim finnst mjög spennandi að ganga um skipið og heyra sögu þess.“

En skiptir svo ekki máli að tengja safnið við þá sögu og starfsemi sem átti sér stað hérna við gömlu höfnina?

„Jú. Reykjavík er fyrst og fremst hafnarborg. Ingólfur Arnarson hefur líklega sest hér að vegna þess hve góð höfnin var frá náttúrunnar hendi. Af sömu ástæðu hófust ekki stórvægilegar framkvæmdir við hafnargerð í Reykjavík fyrr en 1913, en þær framkvæmdir urðu hins vegar stærstu framkvæmdir Íslandssögunnar fram að þeim tíma og voru gríðarlega mikilvægur þáttur í örri uppbyggingu höfuðborgarinnar. Lengst af síðustu öld var höfnin síðan veröld út af fyrir sig með feikilega fjölbreyttu og gróskumiklu athafnalífi – aðstöðu fyrir varðskipin, togarana, farskip Eimskipa, Ríkisskip og stóra og smáa fiskibáta. Auk þess vöruskemmur og gamalgróin þjónustufyrirtæki. Héðan sigldu menn til útlanda og komu aftur heim og höfnin var því sannkölluð lífæð borgarinnar. Það skiptir því miklu fyrir safnið, sem er ekki síst safn Reykjavíkurhafnar, að skipulagsyfirvöld varðveiti hluta af þessu umhverfi og athöfnum og víkki þannig út hlutverk safnsins og tilvísanir.“

Fjölskylda

Eiginkona Eiríks er Heiða Helena Viðarsdóttir, f. 11.2. 1963, starfskona við leikskóla. Hún lauk stúdentsprófi 1983 og sveinsprófi í hárgreiðslu 1993. Hún er dóttir Viðars Janussonar, fyrrv. prentara við Prentsmiðju Morgunblaðsins, og Guðrún Eiríksdóttir, fyrrv. starfskona við Landakotsspítala.

Dætur Eiríks og Heiðu Helenu eru Guðrún Rakel, f. 9.1. 1983, að ljúka kandidatsnámi í sálfræði við Kaupmannahafnarháskóla, en maður hennar er Andri Valur Gunnarsson rafvirki og eru börn þeirra Birkir Valur og Heiða Bríet; Ása Hrund, f. 4.9. 1987, nemi, og Birna Rún, f. 23.7. 1993, nemi, en sambýlismaður hennar er Ebenezer Þórarinn Einarsson viðskiptafræðinemi og er dóttir þeirra Emilía Klara.

Systkini Eiríks: Brynja Jörundsdóttir, f. 29.6. 1949, starfsmaður hjá Póstinum, búsett í Kópavogi; Guðmundur Jörundsson, f. 10.6. 1950, íþróttakennari, búsettur í Hafnarfirði, og Atli Jörundsson, f. 23.5. 1955, d. 31.5. 2007, vélstjóri og rafvirki.

Foreldrar Eiríks: Jörundur Engilbertsson, f. 1.7. 1927, d. 28.1. 2003, fiskmatsmaður hjá SÍS, og Bjarnveig Guðmundsdóttir, f. 25.3. 1930, d. 27.3. 2001, starfsmaður hjá Hrafnistu í Hafnarfirði.