Brids - Guðmundur Páll Arnarson | ritstjorn@mbl.is

Stund sannleikans. A-Enginn

Cezary Balicki bregst sjaldan í vörninni, en „skýst þótt skýr sé“. Hann var hér í austur í vörn gegn 5♣ dobluðum. Makker hans kom út með ♥4 (fjórða hæsta) og Balicki átti slaginn á ♥K. Stund sannleikans.

Balicki lagði niður ♦Á í öðrum slag. Sagnhafi trompaði, stakk þrisvar hjarta í borði með ♣Á42 og svínaði fyrir ♠K. Ellefu slagir.

Spilið kom upp í pólsku meistaradeildinni fyrir nokkrum dögum og á hinu borðinu var Apolinary Kowalski í austur, einnig í vörn gegn laufsamningi. Hann fékk út hjarta, eins og Balicki, drap á kónginn og skipti yfir í trompsexu!

Sú frumlega vörn heldur sagnhafa í tíu slögum, hvað sem hann gerir. Í reynd stakk sagnhafi hjarta tvisvar með ♣Á4 og gaf þá á ♣K og háhjarta.

Synd og skömm að samningurinn var bara ÞRJÚ lauf, ekki fimm.