Hér talar allt einni tungu

Helgi Bjarnason

helgi@mbl.is

„Sýning um Snorra á hvergi betur heima en hér. Það skapast sérstök nánd fyrir gesti að koma á staðinn og rifja upp atburði úr ævi Snorra sem gerast hér á staðnum og jafnvel sjá ummerki í landinu. Hér talar allt einni tungu,“ segir Óskar Guðmundsson rithöfundur sem er höfundur nýrrar sýningar um ævi Snorra Sturlusonar í Snorrastofu í Reykholti. Sýningin sem nefnist einfaldlega Saga Snorra verður opnuð með athöfn í dag.

Farið er í gegnum ævi Snorra og teknir sérstaklega fyrir nokkrir atburðir á hans dögum og áhrif hans á menningu Norður-Evrópu. Óskar segir að tilgangurinn sé að vekja áhuga nútímafólks á Snorra og arfleifð hans. Unnt er að fara um líf hans á nokkrum mínútum en einnig dýpra í ýmsa þætti og verja til þess klukkustundum og jafnvel dögum með aðstoð spjaldtölva.

Vígásar til verndar

Gestir komast í vébönd sýningarinnar með því að ganga undir fagurlega útskorna og fjörlega málaða vígása. Höfundar þeirra sækja hugmyndir sínar til miðalda. Óskar segir að dyraumbúnaðurinn sé liður í því að sýna litauðgi miðalda. Vígásar eru tré sem ætlað er að varna ófriðarmönnum inngöngu í hús. Þeir koma fyrir í sögunum en er ekki lýst. Ein frásögnin tengist Snorra í Reykholti beint. Innheimtumenn hans gátu ekki gengið eftir fornu fémáli á Stað í Hrútafirði vegna þess að þar voru vígásar í durum.

Á sýningunni eru fáeinir munir úr fornleifauppgreftri í forna kirkjustæðinu í Reykholti. Það er gler og leir frá þeim stöðum í Evrópu sem slíkt gerðu best. Munirnir láta ekki mikið yfir sér en Óskar vekur athygli á að þeir gefi til kynna glæsileik og evrópsk tengsl. „Við vorum í Evrópusambandinu í vissum skilningi. Ég segi þetta ekki aðeins af því að ég er krati,“ segir Óskar. Hann útskýrir þessi orð með því að nefna tengslin í gegn um kaþólsku kirkjuna. Vegna hennar hafi leiðir okkar legið til Niðaróss og Rómar. Þá hafi Íslendingar í raun verið í konungssambandi við Noreg og höfðingjar hér barist um hylli konungs í innanlandsátökum. Loks getur hann um sameiginlegt tungumál og menningu sem Íslendingar áttu með Norðmönnum og fleiri norrænum þjóðum við strendur Evrópu.