Brids - Guðmundur Páll Arnarson | ritstjorn@mbl.is

Fagurgali. N-NS

Misjafnlega gekk að melda alslemmu í þessu spili frá landsliðskeppni helgarinnar. Á tveimur borðum var spilað geim, fjögur pör sögðu hálfslemmu, en aðeins tvö komust alla leið í 7♥. Átta skot og sex framhjá.

Ragnar Hermannsson og Guðmundur Snorrason voru í hittna hópnum. Guðmundur passaði sem gjafari í norður og Ragnar opnaði á 2♣, sterkum. Svörin við alkröfunni grundvallast á yfirfærslum, þannig að Guðmundur sýndi strax hjartalit með 2♦. Nú kom austur inn á 3♣ og Ragnar tók undir hjartað með 4♣. Norður á enga augljósa sögn, en Guðmundur hélt lífi í slemmuleitinni með 4♦ (síðasta útkall). Þá var leiðin opin fyrir Ragnar að halda áfram og hann valdi að stökka í 5♥. Sögnin sú lofar öllu fögru til hliðar og biður makker að hækka í 6♥ með gott tromp. Guðmundur gerði gott betur – lyfti í 7♥.