Þetta er „fínasti“ bíll sem ég hef eignast og auðvitað hreint afbragð,“ segir Vigdís Finnbogadóttir, fyrrverandi forseti Íslands. Meðal margra forvitnilegra bíla í safni í Brákarey í Borgarnesi, sem félagar í Fornbílafjelagi Borgarfjarðar hafa sett á laggirnar, er bíll sem Vigdís átti á síðari hluta forsetatíðar sinnar, en embættinu gegndi hún frá 1980 til 1996.
Bíllinn góði af gerðinni er Toyota Crown Royal Saloon, árgerð 1988 og var lúxusbíll á mælikvarða síns tíma. Vigdís átti bílinn í nokkur ár, en síðar komst hann í eigu sveitafólks vestur á Snæfellsnesi. Það aftur seldi fornbílamönnum í Borgarnesi bílinn á sl. ári fyrir eina krónu. Má því segja að salan sú hafi fremur verið táknræn en raunveruleg viðskipi.
Alltaf á fjölskyldubílum
„Bíll þessi var einstaklega vel tækjum búinn. Ég man eftir því að í honum var segulband og þegar ég stoppaði las ég stundum inn á það ýmislegt sem mér hafði dottið í hug, sem gjarnan urðu punktar í ræðum, ávörpum og greinum. Undir stýri erum við einbeitt og árvökul og mín reynsla er sú að á ferðalögum vakni oft góðar hugmyndir,“ segir Vigdís sem á forsetaárum sínum hafði að sjálfsögðu bæði embættisbíl og bílstjóra. Var þó oft á eigin bíl.„Mér fannst ég frjálsari þannig og var engum háð á eigin bíl,“ segir Vigdís sem í dag ekur um á Toyota-jepplingi. Hún segist raunar alltaf hafa átt og verið á hefðbundnum fjölskyldubílum. Sér líki þeir best.
Meðal aðstandenda bílasafnsins í Borgarnesi er Sæmundur Sigmundsson, rútubílstjóri til áratuga. Sú var tíðin að Sigmundur ók um landið á sumrin með erlenda ferðamenn og í þeim ferðum var Vigdís oft leiðsögumaður. „Ég er sögufróð en hann þekkti nöfn á bæjum, fjöllum og tindum. Við Sæmundur náðum vel saman,“ segir Vigdís sem þykir skemmtilegt og á sinn hátt markvert að gamli bíllinn hennar sé orðinn sýningargripur á safni.
Bls 6-7 sbs@mbl.is
Til baka
Leita í greinasafni
Prenta grein
