Baldur samur við sig

Í Kaplakrika

Víðir Sigurðsson

vs@mbl.is

Eftir þó nokkrar ófarir í leikjum sínum gegn FH frá síðustu aldamótum hafa KR-ingar heldur betur snúið blaðinu við. Þeir lögðu Hafnfirðingana tvívegis í úrvalsdeildinni í fyrra, þar sem Baldur Sigurðsson skoraði í báðum leikjum, og hann skoraði fyrsta markið og krækti í vítaspyrnu á fyrstu 12 mínútunum í stórmeistaraslagnum í Kaplakrika í gærkvöld.

Í leiðinni náði hann í rautt spjald á Róbert Örn Óskarsson, markvörð FH. KR-ingar voru manni fleiri í 80 mínútur og nýttu sér það þegar upp var staðið, unnu 4:2 og eru með tveggja stiga forskot á Val á toppi deildarinnar en FH seig niður í þriðja sætið.

Þriðji sigur KR á FH í röð í deildinni en þetta var fyrsta tap FH-inga í 12 deildaleikjum – síðan þeir biðu lægri hlut fyrir KR 23. ágúst í fyrra.

Var rauða spjaldið sanngjarnt?

Rauða spjaldið á Róbert var þó umdeilanlegt. Hann braut á Baldri, engin spurning, en Mývetningurinn var á leið frá markinu og ekki sjálfgefið að hann hefði náð skoti á markið þótt hann hefði farið óáreittur framhjá markverðinum. Dómurinn var strangur hjá Magnúsi Þórissyni og þung refsing fyrir FH-inga að vera manni færri í allan þennan tíma.

Þótt KR-ingar virtust lengi vel vera með öll ráð FH í hendi sér snerist dæmið við að hluta þegar Björn Daníel Sverrisson minnkaði muninn í 2:1 í lok fyrri hálfleiks, og þegar hann jafnaði 20 mínútum fyrir leikslok, 2:2, virtist það ótrúlega ætla að gerast. FH-ingar virtust til alls vísir.

En þeir gleymdu sér í ákafanum. Í stað þess að draga sig til baka og halda stiginu, sem hefði verið mjög ásættanlegt við þessar aðstæður, vildu þeir meira og KR-ingar voru ekki lengi að refsa. Glæsilega útfærð skyndisókn og Óskar Örn Hauksson kom þeim yfir á ný. Það var of mikið fyrir Íslandsmeistarana.

KR-liðið er stöðugt að styrkjast. Rúnar Kristinsson er að fá inn menn sem hafa verið meiddir. Gunnar Þór Gunnarsson og Haukur Heiðar Hauksson eru góð viðbót við vörnina, ekki síst þar sem Brynjar Björn Gunnarsson var ekki með vegna meiðsla og Bjarni Guðjónsson var fljótlega orðinn laskaður. Atli Sigurjónsson er stöðugt að gera sig meira gildandi í Vesturbænum. Skemmtilegur og sparkviss miðjumaður sem kórónaði fínan leik með því að leggja upp fjórða markið í lokin með glæsilegri sendingu.

Hinum megin var Björn Daníel Sverrisson nærri því að vera hetja kvöldsins. Tvö mörk frá honum, bæði eftir flottar sendingar Ólafs Páls Snorrasonar, og liðið manni færri. FH sýndi styrk sinn með því að jafna og er líklegt til að halda sínu striki í toppslagnum þrátt fyrir þessi úrslit.

Daði Lárusson, sem verður fertugur í næstu viku, kom í mark FH þegar Róbert var rekinn af velli og lék sinn fyrsta leik með liðinu í deildinni frá 2009, en Daði var í Haukum í þrjú ár. Ljóst er að Daði ver mark FH-inga aftur, þremur dögum fyrir fertugsafmælið, því Róbert fer í eins leiks bann vegna rauða spjaldsins.