Skoski rithöfundurinn Iain Banks er látinn, 59 að aldri. Hann var einn virtasti og vinsælasti höfundur Skota síðustu árin, kunnur fyrir bækur á borð við „The Wasp Factory“ og „The Crow Road“. Í skoðanakönnun sem Waterstone's verslanirnar létu framkvæma fyrir nokkrum árum lenti fyrrnefnda sagan á lista yfir 100 bestu skáldsögur allra tíma. Fyrir utan fagurbókmenntir sendi hann frá sér vísindaskáldsögur undir höfundarnafninu Iain M. Banks.
Í apríl síðastliðnum upplýsti Banks að hann hefði greinst með krabbamein í gallblöðru og ætti í mesta lagi nokkra mánuði ólifaða.
Væntanleg skáldsaga Banks, „The Quarry“, byggir á glímu höfundarins við krabbameinið en hún fjallar um síðustu vikurnar í lífi aðalpersónu hennar. Sagan kemur út 20. júní og hafði Banks vonast til að lifa að sjá hana koma út.
Til baka
Leita í greinasafni
Prenta grein
