Ný röntgentæki sem stórbæta greiningar voru tekin til notkunar á Sjúkrahúsinu á Akureyri síðastliðinn föstudag. Tækin eru af fullkomnustu gerð. Þá auka þau öryggi sjúklinga og munu bæta verulega greiningarhæfni við rannsóknir, að því er segir í tilkynningu frá velferðarráðuneytinu. Í tilefni af þessu heimsótti Kristján Þór Júlíusson heilbrigðisráðherra Sjúkrahúsið á Akureyri og Heilsugæslu Akureyrar til að kynna sér starfsemi stofnananna og ræða ýmis málefni þeirra.
Framkvæmdastjórn Sjúkrahússins á Akureyri ræddi sérstaklega við ráðherrann um stöðu barna- og unglingageðlækninga enda er enginn barna- og unglingageðlæknir starfandi við sjúkrahúsið. Lagði Kristján Þór áherslu á að leysa þetta vandamál til að tryggja þjónustu við íbúa svæðisins. skulih@mbl.is