Eins og allir vita þá eru hinir raunverulegu skúrkar í þjóðfélaginu þeir sem eiga ekki fyrir rafmagnsreikningnum sínum um mánaðamótin – að ekki sé minnst á þá sem eru svo vitlausir að vilja eiga þak yfir hausinn á sér.

Eins og allir vita þá eru hinir raunverulegu skúrkar í þjóðfélaginu þeir sem eiga ekki fyrir rafmagnsreikningnum sínum um mánaðamótin – að ekki sé minnst á þá sem eru svo vitlausir að vilja eiga þak yfir hausinn á sér. Þeir lenda á nauðungaruppboði:

Enn fá skúrkarnir skyldug spörk

og skuldabyrðina þyngri og þyngri,

en Hótel Örk kaupir Hótel Örk

og Hótel Örk græðir á tá og fingri.

Þessi vísa er móðir vísunnar: Margan rakst hann á refilstíg...

Mönnum er í fersku minni þegar Jóhanna Sigurðardóttir forsætisráðherra kallaði þingmenn vinstri-grænna villiketti að gefnu tilefni. Þetta rifjaðist upp þegar ég sá þessar stökur með minni rithönd í dóti föður míns. Veit ekki tilefnið og ekki einu sinni höfundinn!

Heldur finnst mér gaula í görn

gömul eymda seyra

þótt þeir hafi kött og kvörn

og kannski eitthvað fleira.

Þegar skolli þingi sleit

þótti fáum gaman.

Kötturinn á kónginn leit

og kipraði sig í framan.

Á Músaþverá vel ég veit

verður ei heldur gaman;

komin er þar í kröggur sveit

kattarlaus öll saman.

Síðan hef ég skrifað á spássíu: Guðjón Helgason í Brimnesi:

Lá ég úti í löndum mínum

lítinn þátt úr öld

svásrar gyðju sekúndustillir

sirka spesíalt kvöld.

Þá fann ég bækling, Nöfn Dalamanna 1703-1845, með kærri kveðju frá fóstra mínum Gísla Jónssyni menntaskólakenara á Akureyri, – sérprent úr Skírni haustið 1991. Aftan á kápu var þessi limra skrifuð með vinarhug G.J:

Að sigrast á Framsóknarfjanda

og sem fastast á rétti að standa

er afrek og sómi

að ófárra dómi

og heitir að vaxa með vanda.

Kristján Karlsson orti:

Oft var hesti Óðins brátt,

eyjum trúi eg strái.

Breiðfirðingar engri átt

ætla að þetta nái.

Halldór Blöndal

halldorblondal@simnet.is