Silja Björk Huldudóttir
silja@mbl.is
Kaldalónshátíð verður haldin í fyrsta sinn í Dalbæ á Snæfjallaströnd sunnudaginn 14. júlí, en hátíðin er eins og nafnið gefur til kynna helguð tónskáldinu og lækninum Sigvalda Kaldalóns. Dagskráin hefst kl. 18 með sýningu Kómedíuleikhússins á einleik um tónskáldið, sem frumsýndur var á Ísafirði fyrr á þessu ári. Að sýningu lokinni fer fram sögustund um ár Kaldalóns við Djúpið og því næst verða Viðar Guðmundsson og Snorri Hjálmarsson með tónleika þar sem þeir flytja nokkrar af helstu perlum tónskáldsins.
„Það er tilvalið að mæta snemma og njóta náttúrunnar á svæðinu,“ segir Elfar Logi Hannesson, leikari og forsprakki Kómedíuleikhússins, um leið og hann fagnar frumkvæði ábúenda í Dalbæ sem áttu hugmyndina að Kaldalónshátíðinni. Aðspurður um einleik sinn um tónskáldið segir hann um dramatíska sögu að ræða. „Sigvaldi Kaldalóns átti litríka ævi. Hann tók við læknisembætti í einu afskekktasta og víðfeðmasta læknishéraði landsins, Nauteyrarhéraði, árið 1910. Hann bjó og starfaði í Djúpinu í ein ellefu ár, en varð frá að hverfa þegar hann fékk berkla. Hann leitaði sér lækningar á berklaspítala í Danmörku og þar læt ég verkið gerast,“ segir Elfar Logi sem bregður sér í hlutverk tónskáldsins í einleiknum sem hann samdi sjálfur.