20. ágúst 1898 Veitinga- og gistihúsið Valhöll á Þingvöllum var vígt. Nafn sitt dró húsið af búð Snorra Sturlusonar sem stóð forðum skammt frá þeim stað þar sem húsið var fyrst, en það var flutt nær Þingvallavatni 1929. Húsið brann sumarið 2009. 20.
20. ágúst 1898
Veitinga- og gistihúsið Valhöll á Þingvöllum var vígt. Nafn sitt dró húsið af búð Snorra Sturlusonar sem stóð forðum skammt frá þeim stað þar sem húsið var fyrst, en það var flutt nær Þingvallavatni 1929. Húsið brann sumarið 2009.
20. ágúst 1933
Fjórir menn komu á bíl að Mýri í Bárðardal eftir fimm daga ferð úr Landsveit í Rangárvallasýslu. „Er þetta í fyrsta skipti að bíll fer Sprengisandsveg, landsfjórðunganna á milli,“ sagði í Morgunblaðinu.
20. ágúst 1942
Sjö manna áhöfn vélbátsins Skaftfellings bjargaði 52 Þjóðverjum af kafbátnum U-464 sem Catalina-herflugvél með bækistöð í Skerjafirði hafði sökkt 175 sjómílum suður af Hornafirði.
20. ágúst 1973
Sendiherra Bandaríkjanna afhenti forseta Íslands tunglstein, sem fluttur var til jarðar í ferð Apollo 17 í desember árið áður, og íslenskan fána sem hafði verið farið með til tunglsins.
20. ágúst 1995
Hópur erlendra ferðamanna lenti í hrakningum á norðanverðum Vatnajökli. Þeim var bjargað og átta voru fluttir með þyrlu á sjúkrahús vegna ofkælingar. „Við sáum ekkert, fukum til og frá, lögðumst niður og reyndum að skríða,“ sagði ísraelsk kona í samtali við Morgunblaðið.Dagar Íslands | Jónas Ragnarsson.