Úrskurður Persónuverndar um að Fiskistofu hafi ekki verið heimilt að taka upp athafnir áhafnar skips sem staðin var að framhjálöndun hefur ekki áhrif á málið gegn útgerð skipsins að sögn Eyþórs Björnssonar fiskistofustjóra.
Fiskistofa hafði rökstuddan grun um að tiltekið skip landaði hluta af afla sínum og flytti burt án þess að vega hann á hafnarvog líkt og lög gera ráð fyrir. Því nýtti Fiskistofa upptökuvél til að fylgjast með skipinu á hafnarsvæðinu í fjögur skipti. Það leiddi til þess að skipverjar voru staðnir að framhjálöndun. Skip var svipt veiðiheimildum í tvær vikur og málið kært til lögreglu.
Í mars barst Persónuvernd svo kvörtun yfir þessu myndavélaeftirliti Fiskistofu. Hún úrskurðaði nú í vikunni að stofnuninni hefði ekki verið heimilt að fylgjast leynilega með athöfnum skipverjanna á hafnarsvæðinu og skort hefði á viðvaranir um rafræna vöktun. Fiskistofu er gert að eyða því efni sem safnað var með upptökunum. Eyþór segir það þó ekki hafa áhrif á framgang málsins.
„Myndupptökurnar eru ekki gagn í málinu en þær nýttust okkur auðvitað til að sjá hvernig þeir höguðu sér við brot svo við vissum hvernig ætti að taka á málinu,“ segir Eyþór. Úrskurðurinn útilokar að Fiskistofa noti sömu aðferð í framtíðinni til að upplýsa brot og segir Eyþór stofnunina þurfa að endurskoða verklag sitt. Þá veltir hann upp hvort tilefni sé til að færa Fiskistofu heimildir í lögum til að beita myndavélum á hafnarsvæðum.
Til baka
Leita í greinasafni
Prenta grein
